Anëtari i kryesisë së PD, Gent Strazimiri, në një intervistë për FaxNews ka folur për protestën e datës 7 korrik, e cila organizohet nga selia blu. Strazimiri tha se protesta do të mbahet në një kohë që çmimet në Shqipëri janë më të lartat në rajon. Anëtari i Kryesisë së PD, theksoi se pjesëmarrja e qytetarëve në protestë është jetike, pasi bëhet fjalë për bukën e gojës. Ai gjithashtu u shpreh se protesta e 7 korrikut do të pasohet edhe nga demonstrata të tjera.
“Në këtë situatë ka dalë me fitim vetëm qeveria dhe nuk ka asnjë shenjë se këto të ardhura do të shpërndahen tek qytetarët. Madje edhe bordi i transparencës që supozohej të ultë çmimet, vetëm sa po i ngre më shumë.
Këtu nuk bëhet më fjalë për mallra luksi dhe as për pushime në verë. Këtu po bëhet fjalë për bukën e gojës për secilin prej qytetarëve.
Berisha ka bërë thirrje që të ngrihemi dhe të reagojmë. Regjimet kërkojnë punë për t’u rrëzuar por hapi i parë është që të ngrihemi të gjithë bashkë dhe ta shohim realitetin me sy.
Jemi të vjedhur të gjithë nga e njëjta dorë. Ajo është dora e Edi Ramës dhe e oligarkëve të tij të cilët së bashku me qeverinë janë të vetmit të cilët nuk po e vuajnë krizën. Në 7 korrik do të mbahet protesta e parë por besoj se do të pasohet edhe nga protesta të tjera. Për të mbrojtur bukën e fëmijëve dhe për të rrëzuar këtë regjim duhet shumë mund dhe djersë. PD e ka dhënë provën se është gjithmonë në mbrojtje të interesit publik.”-tha Strazimiri.
Discussion about this post