Poçemi, një fshat i lënë në harresë që ende vuan mungesën e infrastrukturës. Pa rrugë të asfaltuar dhe pa qendër shëndetësore, Poçemi është pjesë e njësisë adiministrative Fratar, të Bashkisë Mallkastër.Mungesa e investimeve në këtë zonë ka “paralizuar” zhvillimin e këtij fshati sipas fermerëve të zonës, të cilët theksojnë se shtrimi i rrugës kryesore do të përgjysmonte lidhjen e autostradës Levan-Tepelenë me Vlorën.
Rruga kryesore që do të ndihmonte të progrersin ekonomik të këtyre familjeve është afro 7 km e gjat që lidh autostradën Levan Tepelenë. Banorët e zonës kryesisht merren me vreshtari, ullishte dhe blegtori, por mungesa e rrugës i penalizon në tregtimin e prodhimit të tyre në tregjet e Fierit apo të Vlorës.
Resurse natyrore janë një vlerë e shtuar e kësaj zone, por sërish mungesa e investimeve i zbeh këto elementë, ndaj banorët pohojnë se shtrimi i këtij segmenti rrugor është domosdoshmëri, pasi nga austostrada Levan – Tepelene deri në Vlorë nga Poçemi do të shkurtohej 50% e rrugës.
Kjo rrugë tejet e amortizuar po u shkatërron banorëve dhe automjetet që ata qarkullojnë, por penalizon dhe turizmin, pasi grupe turistësh nga vende të ndryshme të botës vijnë nga Vlora për në Bylis dhe anasjelltas.
Shqetësuese për banorët mbetet dhe mungesa e qendrës shendetësore e cila është gati në rrënim për shkak të dëmtimeve nga tërmeti por edhe nga shkarja e tokës nga lagështira. Ata thonë se e marrin shërbimin shëndetësor, ndonëse godina është thuajse e rrënuar.
Kjo situatë pranohet dhe nga infermiera e kësaj qendre shëndetësore e cila thekson se bashkia është në dijeni të kësaj situate, por nuk kanë reaguar ende.
Premtimet për investim në zonë shfaqen vetëm gjatë zgjedhjeve, por mbeten thjesht premtime elektorale të pazbatuara.
