Makina e një ish-efektivi të krimeve të policisë vendore në Pogradec është djegur gjatë natës në rrethana që paraprakisht dyshohen aksidentale, por nuk përjashtohet edhe një akt kriminal i qëllimshëm.
Bashkë me mjetin “Volkswagen” u dogjën pjesërisht edhe dy makina të tjera që ndodheshin pranë tij.
Ngjarja ndodhi rreth orës 01:30, në fshatin Rrëmenj. Policia vendore informoi se ngriti grup hetimor për të zbardhur dinamikën e ngjarjes.
Ish-oficeri i krimeve Leonard Dervishllari kishte ditë që nuk e kishte lëvizur mjetin e tij, të cilin e kishte parkuar pranë banesës.
Grupi hetimor po vazhdon ende me hetimet, duke marrë gjithashtu edhe deklaratën e Dervishllarit.
Paraprakisht ai ka sqaruar për ish-kolegët se nuk ka konflikte dhe se nuk dyshon te asnjë njeri, përveç të tjerash është shprehur edhe se nuk dyshon që zjarri të jetë i qëllimshëm.
Kujtojmë se së bashku me mjetin e ish-oficerit të policisë u dogjën pjesërisht edhe dy mjete të tjera të parkuara afër tij.
Pavarësisht dëshmisë së ish-efektivit, grupi hetimor po verifikon të gjitha pistat, edhe për shkak të detyrës që ka mbajtur më herët. Pritet ekspertimi auto-teknik, por nga këqyrja paraprake dyshohet për zjarr aksidental.
Discussion about this post