Pogradeci i pafat në shtëpi, Lushnja i mohon fitoren ekipit “liqenor”

Trajneri i Lushnjes, Erjon Xhafa në një prononcim pas ndeshjes u shpreh i kenaqur me rezultatin.

“E kishim vlerësuar shumë ndeshjen me Pogradecin pasi është një skuadër e mirëfinancuar me një merkato të mirë. Ne kemi pasur shumë mungesa dhe e kemi pasur të pamundur të bënim diçka tjetër. Strategjia jonë ishte të ndalnim Pogradecin.

Kemi pasur raste në pjesën e parë dhe të dytën, por nuk ishim cinikë, jam i kënaqur me një pikë siç shkoi ndeshja. Pjesën e parë mendova të limitoj forcën e Pogradecit duke e ditur që kanë një ekip të mirë. E prisja të më merrnin metra, kemi duruar dhe kemi mbrojtur mirë.

Kemi pasur probleme me sulmuesit që më mungojnë dy të sapoardhur, plus Hoxhën që e kam të dëmtuar. Kam pak alternativa në këtë repart dhe nuk mund të guxoja. Rezultati i barazimit ishte i drejtë për të dyja skuadrat”, u shpreh Xhafa.

Ndërsa trajneri i Pogradecit, Ardian Mema, u shpreh se shpresonte të arrinte një fitore, pasi edhe loja e ekipit ishjte shumë me mire se e kundërshtarit.

“Ndoshta është dhe ndeshja e parë por e rëndësishme që dalim para portës dhe kemi rastet e nevojshme për të shënuar por sot nuk shënuam. Katër apo pesë raste janë shumë në futboll por do shikohet në vazhdimësi. Kjo është ndeshja e parë, ndoshta dhe pjesa emocionale, çdo gjë ndodh.

Ne shpërdoruam shumë dhe kjo ishte pjesa që duhet të kemi kujdes dhe të fokusohemi në vazhdimësi. Puna dhe stërvitja duhet për të shënuar golin pavarësisht që nuk e shënuam nga sulmuesi kryesor por mund të vijë nga linja e dytë, një mesfushor që të shënojë golin.

Ekipi është shprehur mirë dhe ka pasur rastet e nevojshme për të fituar ndeshjen. Ndoshta dhe një gol të liron emocionalisht dhe psikologjikisht. Ndoshta kjo na ka munguar sot. Dhe me vazhdimin e lojës lojtarët bëhen konfuz. Kemi një ekip që duhet të shënojmë shpejt se mund të lirohemi shumë më tepër se ajo lojë e mirë që u bë”, tha ai.