Djali i Ymer Lalës, Ylard Lala, është arrestuar nga policia e Tiranës për akuzat “Organizimi ose ushtrimi i veprimtarive të lojërave të fatit në kundërshtim me ligjin”, dhe “Vënia në dispozicion e lokaleve për lojëra të palejuara”.
Referuar të dhënave në Qendrën Kombëtare të Biznesit, 24-vjeçari Ylard Lala rezulton pronar i një lokali në rrugë “Andon Zako Cajup”, në zonën e ish-Bllokut, ku kanë mësyrë të efektivë të komisariatit numër 2.
Nga video e aksionit e publikuar nga vetë policia, shihet një grup personash rreth një tavoline pokeri. Sipas akuzës, djali i Ymer Lalës ishte një ndër organizatorët e lojërave të paligjshme të fatit.
Aksioni
Aksioni i koduar “Poker 2”, njoftoi policia të enjten, erdhi bazuar në informacionet e siguruara nga inteligjenca informative për një rast të ushtrimit të veprimtarisë së paligjshme të lojërave të fatit.
Sipas të njëjtave burime, 11 persona u kapën në flagrancë brenda lokalit, ndërsa 7 të tjerë u proceduan në gjendje të lirë. Një 38-vjeçare është mes personave të arrestuar, ndërsa një 34-vjeçare është vënë në hetim në gjendje të lirë.
Bashkë me djalin e Ymer Lalës, i cili sipas raportimeve mediatike rezulton punonjës i Gardës së Republikës, për akuzën “Organizimi ose ushtrimi i veprimtarive të lojërave të fatit në kundërshtim me ligjin”, u arrestuan: Eglantin Fejzaj, 43 vjeç, Nikolin Prenga, 49 vjeç, Fatmir Rumani, 58 vjeç, Rexhep Noka, 32 vjeç, Arbjon Tocilla, 25 vjeç, Marjan Ndoj, 46 vjeç, Henrik Bruka, 23 vjeç, Romario Kodra, 26 vjeç, Erjola Vllahu, 38 vjeçe, dhe Cen Mehmetaj, 56 vjeç.
Ndërsa për moskallëzim krimi u proceduan penalisht: E.N., 18 vjeç, F.P., 39 vjeç, K.N., 36 vjeç, K.P., 21 vjeç, A.Sh., 34 vjeçe, D.Gj., 33 vjeç, dhe H.D., 35 vjeç.
“Gjatë kontrolleve të ushtruara, shërbimet e Policisë kanë kapur në flagrancë duke luajtur lojëra fati në kundërshtim me ligjin, shtetasit e arrestuar, në një lokal në administrim nga shtetasi Y.L. (Ylard Lala), ndërsa 7 shtetasit e proceduar në gjendje të lirë, kanë pasur dijeni për ushtrimin e kësaj veprimtarie, dhe nuk e kanë kallëzuar pranë organeve kompetente. Në cilësinë e provës materiale u sekuestruan 1 tavolinë pokeri dhe çipsa, aparate celulare, dhe shuma të ndryshme parash të dyshuara të përfituara nga kjo veprimtari”, njoftoi policia.
Emri i Ymer Lalës u lakuar pas publikimit të përgjimeve të dosjes “184”, ku tregohet angazhimi i tij në grumbullimin e votave për Partinë Socialiste. Ymer Lala njihet si person me influencë në Dibër dhe është akuzuar nga opozita si koka e një grupi kriminal. Ndaj tij, nuk kanë munguar as akuzat se ka porositur vrasje. Vajza e tij Reme Lala u zgjodh deputete në vitin 2017 nën siglën e PDIU-së, megjithatë më vonë iu bashkua Partisë Socialiste të drejtuar nga kryeministri Edi Rama.
Discussion about this post