Një incident ka ndodhur ditën e djeshme në vorbullën e tifozëve që pushtuan kryeqytetin, ku teksa fotoreporteri Genti Shkullaku po kapte foto nga ngjarjet, efektivët e policisë i kanë marr aparatin fotografik.
Lidhur me këtë ngjarje ka reaguar dhe drejtori i Përgjithshëm i Policisë së Shtetit Gledis Nano i cili ka urdhëruar verifikimin e rrethanave të këtij incidenti.
Gjatë takimit të zhvilluar mesditën e djeshme, Drejtori i Përgjithshëm i Policisë së Shtetit u ka dhënë porosi të veçantë drejtuesve të strukturave policore, për mbarëvajtjen e aktivitetit, që gazetarëve dhe reporterëve, vendas e të huaj, t’u krijohen të gjitha lehtësirat, me qëllim që ata të përmbushin misionin e tyre.
Policia e Shtetit kërkon mirëkuptimin e qytetarëve dhe të medias në veçanti, si dhe shpreh angazhimin për të përmbushur më së miri detyrimin për garantimin e rendit dhe sigurisë publike, në një event madhështor siç është finalja e sotme europiane e Conference League.
Discussion about this post