Kontrollet blic të policisë gjatë mbrëmjen e shkuar kanë kapur në shkelje me qindra persona. Mësohet se, në total janë kontrolluar 1872 automjete dhe 134 ambiente të ndryshme dhe si pasojë janë shoqëruar për verifikim, ndër ta 32 persona me precedentë penalë/kriminalë.
Konkretisht, në Tiranë u kapën dhe u shoqëruan për veprime të mëtejshme shtetasit D. S. dhe Sh. H., pasi u konstatuan me lëndë narkotike kokainë dhe cannabis sativa, të ndara në doza. Njëkohësisht, në të gjithë vendin u bllokuan edhe 33 automjete pa dokumentacion dhe disa të shpallura “alert”. Kontrollet e befasishme me intervale të shkurtra kohore dhe në lëvizje do vijojnë në të gjithë vendin, edhe në ditët në vijim.
Gjatë kontrolleve në Fier, u arrestua shtetasi E. H., 28 vjeç, banues në Tiranë, pasi gjatë kontrollit të automjetit, në çantën e tij të krahut, Policia gjeti dhe sekuestroi një armë zjarri tip pistoletë dhe municion luftarak. Në Shkodër, gjatë kontrollit të automjetit me drejtues shtetasin B. S., 22 vjeç, Policia gjeti dhe sekuestroi shumën 31200 euro. Këtë shumë eurosh, drejtuesi i mjetit deklaroi se e kishte sjellë nga Tirana, për llogari të një shtetasi në Shkodër. Në Vlorë u kontrolluan banesa të personave në kërkim, njëri nga të cilët u kap në Vlorë, konkretisht shtetasi P. N., me masë sigurie “Arrest në burg” për veprën penale “Kultivimi i bimëve narkotike”.
Ndër të tjera raportohet se, në Qafë-Botë, Sarandë, u kap shtetasi në kërkim M. S., banues në Dhërmi, Himarë, të cilit Gjykata i ka caktuar masën e sigurisë “Arrest në burg” për veprën penale “Falsifikimi i dokumenteve”, kryer në bashkëpunim më shumë se një herë dhe “Falsifikimi i vulave dhe stampave” kryer në bashkëpunim më shumë se një herë.
Sakaq, policia bën me dije se vazhdojnë hetimet për të zbardhur më shumë rreth çështjeve të raportuara, për të zbuluar lidhjet e tyre me grupe të tjera kriminale.
Discussion about this post