Një skocez ka hedhur akuza të forta ndaj policisë shqiptare. Në një prononcim për mediat britanike ai tha se, është i apasionuar pas radiove, por polica shqiptare i kishte sekuestruar pajisjet pasi dyshonte se ai ishte spiun. Skocezi Colin McGoëan, që punon si shofer shpërndarjeje, tha se mbeti i shokuar kur ia morën pajisjet, të cilat janë dërguar në një laborator kriminal për ekzaminim të mëtejshëm.
Sipas Daily Record, pajisjet e skocezit u sekuestruan nga Njësia e Krimit Kibernetik në Policinë e Shtetit, e ndihmuar nga Shërbimi Sekret Shqiptar (SHISH).Gazeta shkruan se skocezi është një entuziast amator i radiove, ndërsa në Shqipëri po hetohet për lidhje të dyshuara spiunazhi. “Nuk jam James Bond, të jem i sinqertë. Madje nuk di as si të lidh nga këto video-fonitë e dyerve. Mund t’ju siguroj që nuk po spiunoja,” thotë 46-vjeçari.
“Mbeta i befasuar, por besoj se autoriteteve shqiptare u mungon eksperienca dhe njohurirë për radiot amatore. Kjo është e gjitha. Ata thjesht nuk kanë parë pajisje si tonat”, thotë skocezi. Colin po udhëtonte me një mikun e tij, Paul Tittensor për të ngritur në Tiranë një stacion radio që të transmetonte sinjalin e tyre për të tjerë entuziastë të radiove amatore në botë.
“Mendoj se ata ishin të shqetësuar se mos pajisjet tona ndërhynin në sinjalet që jepen nga policia apo qeveria shqiptare. Por ne operojmë në frekuenca të ndryshme, kështu që kurrë nuk kishte asnjë shans për ndonjë lloj problemi. Në fund na i morën pajisjet dhe i kanë akoma, tre javë më vonë. Unë e di se ata janë në kontakt me prokurorinë në Skoci dhe shpresoj që kjo të ndihmojë për të sqaruar gjërat dhe për të na kthyer pajisjet tona”, tha ai.
Discussion about this post