Një tregtar fruta perimesh nga Elbasani është dhunuar barbarisht dhe mbajtur për disa orë në komisariat, nga efektivët e policisë.
Në një prononcim për mediat tregtari i identifikuar me emrin Amarildo Hoxha ka treguar se ngjarja ka ndodhur në orët e para të mëngjesit, teksa ai ka qenë duke u kthyer nga furnizimi i fruta perimeve për biznesin e tij. Në një moment, tregon ai, është kapur nga efektivët e policisë që patrullonin rreth rrotullimin e Savrës, të cilët i kanë kërkuar dokumentet e makinës. Hoxha në momentin që është ndaluar nga efektivët ishte live në rrjetet sociale.
Tregtari ka treguar se ky është momenti kur një nga policët e ka goditur me grusht pasi i kërkuan të ndërpriste videon dhe ai ka refuzuar. Ky veprim i papritur nga ana e efektivëve ka zgjatur deri në shoqërimin e tij për në komisarit, ku sipas Hoxhës ata kanë vazhduar ta dhunojnë barbarisht. Ndërsa makinën e tij e ka marrë njëri nga kolegët e “dhunuesve”.
Siç e shihni edhe në foto, në fytyrën e tregtarit janë shkaktuar disa fraktura si pasojë e dhunës, ndërsa është mbajtur deri në orën 3 pasdite në komisariat.
Vetëm pas disa orësh qëndrim në komisariat, Amarildo është marrë nga prindërit e tij dhe është dërguar në spital për mjekim.
