Zëdhënësi i Policisë së Kosovës, Baki Kelani, ka deklaruar se ka pasur veprim të organizuar të njësive policore të Serbisë, për t’i rrëmbyer tre zyrtarët policorë, patrullues të vijës kufitare me Serbinë.
Sipas tij, për shkak të këtij veprimi të organizuar për rrëmbim, zyrtarët policorë të Kosovës, nuk kanë mundur të reagojnë. Sipas tij, në raste të tjera, policët kanë të drejtë ta përdorin çdo mjet të mundshëm për t’u vetëmbrojtur.
Ai bëri të ditur se policët e Kosovës, janë rrëmbyer brenda territorit të Kosovës dhe jo të Serbisë, sic pretendojnë autoritetet atje.
“Çdo polic i din detyrat e veta si duhet të veproj, si janë të përcaktuara me ligj dhe me procedurë. Por ndonjëherë situata dhe forma e rastit të dirigjon ndryshe, në këtë rast duke e parë që ka qenë një veprim i organizuar për një kidnapim klasik, ka ndodh ky rast si ka ndodh. Në raste të tjera, zyrtarët në vetëmbrojtje kanë të drejtë të përdorin çdo mjetë të mundshëm në vetëmbrojtje”, ka thënë ai.
Kelani, tha se në zonat kufitare me Serbinë ka nevojë të shtohet prezenca kufitare.
“Ka nevojë të shtohet prezenca policore [në kufi]. Aty ku vlerësohet që duhet të ketë nevojë të shtohet nevoja policore normal se duhet të shtohen”, tha ai.
Discussion about this post