Policia e Kosovës reagon për arrestimin e këngëtarit shqiptar në “Sunny Hill”

Këngëtari Shemsi Krasniqi ka deklaruar se është arrestuar nga Policia e Kosovës, pasi ishte nisur për të kënduar në festivalin “Sunny Hill”.

Ai ka lëshuar akuza në drejtim të babait të këngëtares së mbarënjohur, Dua Lipa, ku sipas tij, Dukagjini ka urdhëruar që ai të arrestohet me qëllim që të mos këndojë këngën për Adem Jasharin.

Ndërkaq policia e Kosovës ka konfirmuar se e ka arrestuar këngëtarin pasi theu rregullat e festivalit.

“Gjatë zhvillimit të Festivalit Sunny Hill, i cili po mbahet në parkun e Gërmisë, më 06.08.2022 rreth orës 16:50, te bina ku përformojnë artistët, është ndaluar: Sh.K., (viti i lindjes 1955, mashkull kosovar), i cili pa autorizim kishte hipur në binë. Zyrtarë policorë që janë të angazhuar në ofrim të sigurisë gjatë zhvillimit të festivalit, kanë kërkuar që personi në fjalë të largohej nga aty.

Ai nuk ka respektuar urdhrin e personit zyrtar dhe me këtë rast është shoqëruar në stacionin policor. Policia për rastin ka njoftuar prokurorin kujdestar dhe me udhëzim nga i njëjti, i shqiptohet fletë-paraqitje për mosrespektim të urdhrave të personit zyrtar. Policia e Kosovës mbetet e përkushtuar në respektimin e ligjit dhe ruajtjes së rendit dhe qetësisë publike”, thuhet në njoftimin e policisë.