Një ngjarje e rëndë është raportuar gjatë protestës kombëtare të opozitës të zhvilluar sot në Tiranë, ku një fëmijë 10-vjeçar është shoqëruar nga policia dhe dyshohet se është dhunuar fizikisht.
Bëhet fjalë për Romeo Kora, 10 vjeç, i cili sipas deklarimeve nuk ka pasur komunikim me familjen e tij pas shoqërimit.
Raportohet se i mituri ndodhet në gjendje të rënduar psikologjike dhe është i traumatizuar nga ngjarja.
Sipas dëshmisë së dhënë, fëmija ka deklaruar se është goditur me shpullë në kokë, ndërsa ndodhej brenda një mjeti policie.
“Më kanë gjuajtur me shpullë këtu në kokë”, mësohet të ketë thënë i mituri.
Deputeti i Partisë Demokratike, Besart Xhaferri, ka denoncuarnga ambientet e Komisariatit nr. 1 në Tiranë, arrestimin dhe dhunimin e një fëmije 10-vjeçar nga forcat e policisë pas protestës së opozitës këtë të shtunë, 24 janar. Sipas tij, ngjarja skandaloze tregon brutalitetin e një regjimi në ditët e tij të fundit.
Duke folur për mediat, Xhaferri tregoi se fëmija ishte marrë nga policia, ishte futur në makinë dhe sipas dëshmisë së vetë 10-vjeçarit, ishte dhunuar fizikisht. Ai u gjet në një gjendje të rëndë psikologjike, “i shokuar dhe i paaftë të mbante mend as numrin e telefonit të prindërve”, tha deputeti, duke shtuar se fëmija kishte frikë se do të dhunohej përsëri.
Xhaferri akuzoi policinë për shkelje të rënda të procedurave, duke theksuar se për më shumë se dy orë, fëmija ishte mbajtur në komisariat pa u njoftuar shërbimet sociale, psikologu apo prindërit e tij. “Me sa duket këta policë nuk kanë fëmijë, nipa apo mbesa. Janë thjesht robotë që i shërbejnë Edi Ramës,” deklaroi ai.
Discussion about this post