Një zhvillim i paprecedentë ka ndodhur sot në mëngjes, ku një operacion policor ka bërë të pamundur punën në ambientet e televizionit News 24, duke çuar në ndërprerjen e sinjalit të tij. Rreth orës 07:00, dhjetëra forca policore mbërritën në ish-Uzinën e Autotraktorëve, ku ndodhen zyrat e këtij grupi mediatik, duke kërkuar largimin e gazetarëve dhe zbrazjen e godinës.
Sipas raportimeve të mediave, policia po ndalon hyrjen e gazetarëve në ambientet ku operojnë redaksitë e News 24, BalkanWeb, Panorama dhe Gazeta Shqiptare. Ky veprim vjen pas një vendimi të qeverisë së 12 marsit 2025, që i kalon pronësinë e ish-Uzinës së Autotraktorëve kompanisë shtetërore të armëve “KAYO”. Grupi mediatik është qiramarrës afatgjatë në këtë godinë.
Në orën 07:36 të mëngjesit, sinjali i transmetimit të News 24 u ndërpre plotësisht, ndërsa është raportuar gjithashtu se televizionit i është prerë energjia elektrike.
Ky veprim ka ngjallur reagime të ashpra nga komuniteti mediatik. Asociacioni i Gazetarëve të Shqipërisë (AGSH) e cilësoi këtë akt si “shkelje flagrante të parimeve themelore të demokracisë dhe të lirisë së shprehjes”, duke e konsideruar si presion të hapur ndaj medias së lirë. AGSH i bëri thirrje institucioneve shtetërore të ndërpresin menjëherë aksionin dhe të garantojnë të drejtën e gazetarëve për të punuar. Deri tani, zëdhënësi i Policisë së Shtetit nuk ka komentuar mbi ngjarjen.
Discussion about this post