Policia e Tiranës ka arrestuar ditën e sotme 4 persona për vepra penale të ndryshme. Mësohet se kanë rënë në pranga pak minuta më parë një 20 vjeçar E.K dhe A. Gj, 40 vjeç pasi iu gjetën në xhepa qese me doza të vogla kokaine.
Gjithashtu policia ka bërë të mundur arrestimin e një 32-vjeçari i cili përndiqte të ish të dashurën prej disa muajsh dhe ishte kthyer në shqetësim për këtë të fundit. Në prangat e Policisë ka rënë dhe një 34-vjeçar me iniciale F. Ç pasi kishte ushtruar dhunë ndaj pjesëtarëve të familjes. Policia bën me dije se për të dy rastet e fundit ka marrë denoncime në telefona dhe menjëherë ka arrestuar autorët.
Në këtë kuadër, materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme. Pothuajse çdo ditë Policia e Tiranës raporton raste të dhunës fizike në familje apo të dhunës ndaj gruas apo të dashurës, çka vihet re se ky fenomen nuk po reduktohet pavarësisht thirrjeve të shumta sensibilizuese për mbrojtjen e gruas.
