Policia italiane ka zhvilluar një operacion të gjerë antidrogë, duke goditur një rrjet të trafikut të lëndëve narkotike që vepronte mes Italisë dhe Spanjës.
Gjatë aksionit u arrestuan 10 persona dhe u sekuestruan disa kilogramë kokainë dhe lëndë të tjera narkotike.
Sipas policisë së Busto Arsizio, organizata ishte e përbërë nga shtetas shqiptarë, rumunë dhe italianë. Në total u sekuestruan mbi 3 kilogramë kokainë, hashash, heroinë, materiale paketimi dhe rreth 5 mijë euro në para të gatshme.
Operacioni u krye më 12 nëntor, në zonat Varese, Alto Milanese dhe në provincat Pavia, Monza dhe Aosta, me pjesëmarrjen e disa ekipeve të policisë dhe njësive me qen antidrogë. Janë ekzekutuar urdhra paraburgimi për shtatë shtetas shqiptarë dhe një italian, ndërsa arrestime të tjera u bënë në flagrancë gjatë kontrolleve.
Hetimet kanë zgjatur rreth dy vite dhe kanë nisur pas vëzhgimit të shpërndarjes së kokainës në zonën Busto Garolfo dhe Busto Arsizio.
Gjatë hetimit u identifikuan banesa të përdorura si ambiente për përgatitjen e drogës, mjete të regjistruara në emër të personave të tjerë dhe pika takimi në disa biznese.
Discussion about this post