Ndërsa vendi nuk gjend qetësi nga ngjarjet kriminale, plagosjet e vrasjet me armë zjarri, policia kryen operacione për arrestimin e personave që nuk cënojnë aspak sigurinë e qytetarëve.
Vetëm një ditë më parë dy sulme me armë zjarri në Vlorë dhe Fier tronditën vendin. Edhe pse nuk pati të lënduar, lëvizja lirshëm e personave me armën në brez, nuk sjell gjë tjetër veçse shtimin e ngjarjeve kriminale në vend.
Në Fier autori 30- vjeçar Martin Craga është në kërkim, ndërsa policia nuk është vënë në lëvizje për arrestimin e tij, pasi ishte e “zënë” duke u angazhuar në operacionin për lidhjet e jo të ligjshme të dritave nëpër banesa.
“Është vënë në hetim F. Ç , 45 vjeç, banues në Portëz, Fier, pasi gjatë kontrollit të ushtruar nga punonjësit e OSHEE-së dhe shërbimet e Policisë, në banesën e tij u konstatua lidhje e paligjshme e energjisë elektrike”, njofton policia.
Jo se kjo nuk është detyra e tyre, por dosje të tjera kriminale vijojnë të jenë pa u zbardhur ndërsa hetimet zvarriten. Disa prej vrasjeve vijojnë të ngelen pa autorë, e autorët e disa të tjerave vijojnë të jenë në kërkim.
Sakaq, persona të tjerë qarkullojnë lirshëm me armë zjarri nëpër qytete, ky duhet të jetë angazhim serioz për policinë sesa një lidhje jo e ligjshme e OSHEE-SË.
Ngjarja më e freskët që tronditi vendin dhe autorët vijojnë të lëvizin nga një vend në tjetrin, është ajo e vrasjes së Nami Bandullës në Shkodër.
Në mes të ditës, mes qytetarëve duke pirë kafen Bandulla u qëllua në vetëm pak sekonda nga disa persona nga një makinë në lëvizje.
Faza e hetimeve ka ngelur vetëm tek pistat që mund të kenë çuar në ekzekutimin e Bandullës.
Discussion about this post