Policia: Në makinën e viktimës Hamza Lici u gjetën 3 pistoleta, 4 të shoqëruar pas atentatit

Policia e Shkodrës njofton se në automjetin me të cilin udhëtonte Hamza Lici dhe Arlind Bushati u gjetën 3 armë zjarri pistoletë.

Ndërkohë ashtu siç u raportua më herët, një automjet tip Land Rover u gjet i djegur plotësisht në Grudë e Re me 2 automatikë brenda që dyshohet se janë përdorur në ngjarje.

Sakaq, vijon puna hetimore. Hamza Lici mbeti i vrarë nga atentati në Dobraç, kurse Arlind Bushati u plagos në kokë dhe ndodhet në gjendje të rëndë.

‘Nga kontrolli i ushtruar në automjetin që udhëtonin shtetasit H. L., dhe A. B., u gjetën 3 armë zjarri (pistoleta).

Ndërkohë shërbimet e Policisë gjatë kontrollit të zonës për kapjen e autorëve,  në fshatin Golem kanë konstatuar të djegur plotësisht një automjet tip “Range Rover” dhe 2 armë zjarri automatike.

Grupi i posaçëm hetimor në drejtimin e Prokurorisë së Shkodrës, po vijon punën për zbardhjen  e rrethanave, sigurimin e provave me qëllim dokumentimin ligjor të ngjarjes, identifikimin dhe kapjen e autorëve.’

Nga atentati i ndodhur sot në Dobraç të Shkodrës ka mbetur i vdekur Hamza Lici dhe u plagos rëndë Arlind Bushati, që kanë qenë edhe objektivë të autorëve.

Hamza Lici ishte vëllai i Ibrahim Licit, që dyshohet se ndodhet në Turqi, shpallur në kërkim nga shteti shqiptar për vrasjen e Endri Mustafës. Ndërsa, Arlind Bushati është djali i Xhemal Bushatit, ish-kandidat i PD për Bashkinë e Shkodrës. Arlind Bushati disa javë më parë kishte deklaruar në polici se ishte kërcënuar me jetë.

Nuk dihet shkaku i atentatit që i mori jetën Hamza Licit dhe një kalimtareje, por ka dyshime për hakmarrje për shkak të konflikteve të fisit Lici me fise të tjera në Shkodër.

Pas atentatit në Shkodër, ku Hamza Lici dhe një kalimtare ndërruan jetë e dy të tjerë u plagosën, mësohet se katër persona janë shoqëruar në komisariat.

gijotina.com/