Detaje të reja kanë dalë në dritë në lidhje me arrestimin e ish-deputetit të Partisë Socialiste, Alqi Bllako, i cili akuzohet nga SPAK si i përfshirë në aferën e inceneratorëve.
Mësohet se, ai është vetëdorëzuar rreth orës 03:00 të mëngjesit në drejtorinë e policisë së Tiranës. Nuk dihen arsyet që e kanë shtyrë Bllakon të zgjedhë këtë orë për tu vetëdorëzuar, ndërkohë që një natë më parë policia i shkoi në shtëpi, por nuk e gjeti.
Pas 12 orësh spekulimesh për një arratisje të mundshme, vetëm sot në mëngjes Drejtoria e Përgjithshme e Policisë së Shtetit njoftoi se Bllako ndodhet aty që prej mbrëmjes së kaluar. Për orë me radhë u aludua se Bllako ishte arratisur për shkak të një postimi të bërë nga avokati i tij, Sokol Hazizaj, i cili kishte publikuar një foto nga dritarja e një avioni.
Arratisja e Bllakos do kishte vënë në pozitë shumë të vështirë policinë, e cila kishte deklaruar më herët se e kishte shoqëruar në komisariat, por e vërteta rezulton se ai është dorëzuar vetëm në orët e vona të natës, pasi nuk u gjet gjatë kontrollit në banesë.
Discussion about this post