Policia ka zbuluar të tjera detaje nga ngjarja e ndodhur mbrëmjen e djeshme në afërsi të aeroportit të Rinasit, ku persona ende të paidentifikuar qëlluan me armë zjarri ndaj një automjeti dhe më pas u larguan me një makinë që e dogjën disa kilometra më tej.
Në makinën e djegur, që u gjet në zonën e Tapizës, shërbimet e policisë kanë gjetur dhe sekuestruar 4 armë zjarri tip kallashnikov, të cilat dyshohet se janë përdorur gjatë atentatit.
Grupi hetimor, nën drejtimin e Prokurorisë së Tiranës, po punon për identifikimin e autorëve dhe dokumentimin e plotë të rrethanave të ngjarjes. Janë sekuestruar pamjet e kamerave të sigurisë përgjatë itinerarit të dyshuar të makinës dhe po kryhen analiza balistike mbi armët e gjetura.
Burime nga hetimi bëjnë me dije se një nga pistat kryesore lidhet me larje hesapesh mes grupeve kriminale që veprojnë në zonën e Tiranës dhe Fushë-Krujës, por asnjë version nuk përjashtohet. Hetimet vijojnë.
gijotina.com/
Discussion about this post