Kuqezinjtë kanë siguruar me barazimin 1-1 ndaj Moldavisë në transfertë pikën që i nevojitej për pjesëmarrjen në turneun e vitit të ardhshëm, në Kampionatin Evropian.
Fitorja e Kombëtares është përshëndetur edhe nga radhët e politikës shqiptare nga presidenti, kryeministri si dhe krerët e partive kryesore.
Presidenti Bajram Begaj, përmes një postimi në Facebook, uron kuqezinjtë për kualifikimin e merituar.
Presidenti i Republikës, Bajram Begaj ka reaguar pas kualifikimit të Shqipërisë në kampionatin evropian “EURO 2024” që do të zhvillohet në Gjermani.
Përmes një postimi në rrjetet sociale, Begaj falenderon kombëtaren për emocionet dhe kualifikimin e merituar.
“Faleminderit kombëtares për emocionet e dhuruara dhe urime për kualifikimin e merituar në Euro 2024”, shkruan Begaj në Facebook.
Edhe Kryeministri Edi Rama ka reaguar pas kualifikimit të Shqipërisë për herë të dytë në kampionatin evropian.
Teksa ka postuar një foto të tabelës së grupit E, ku Shqipëria renditet e para me 14 pikë, Rama falenderon kuqezinjtë.
“Faleminderit kuqezinjve për këtë dhuratë fantastike”, shkruan Rama duke shtuar “Ëndrra vazhdon”.
Kreu i Partisë së Lirisë, Ilir Meta ka reaguar pas kualifikimit të kombëtares në Kampionatin Europian, pas ndeshjes me Moldavinë.
Në një postim në rrjetin social Facebook, Meta ka uruar ekipin dhe shqiptarët për kualifikimin, teksa quan kualifikimin si historik që gëzon dhe bën krenar kombin tonë.
“Një kualifikim historik që bën krenar dhe gëzon gjithë kombin shqiptar.
Urimet më të përzemërta shqiponjave kuqezi, trajnerit, stafit dhe në veçanti tifozëve të mrekullueshëm për mbështetjen e tyre të jashtëzakonshme në çdo ndeshje.
Jam besimplotë që shkëlqimi dhe entuziazmi i Kuqezinjve tanë do të jetë po aq i jashtëzakonshëm në Kampionatin Europian, kualifikimi në të cilin është plotësisht i merituar.”, shprehet Meta.
Urimi për fitoren historike të Shqipërisë, nuk ka munguar edhe nga ish-kryeministri Sali Berisha
Për së dyti kuqezinjtë bëjnë historinë!
Lojë e bukur, barazim me Moldavinë. Kuqezinjtë pas fitoreve të tyre të mrekullueshme shkojnë me dinjitet, krenarë, të sigurt për suksese të reja në Gjermani.
Urimet më të përzemërta të gjithë ekipit, yjeve të tij, kapitentit, liderit të tyre Sylvinho, arkitekt i kësaj arritje historike. Urime!
Discussion about this post