Autoriteti Portual Durrës ka hapur një tender me vlerë 7.8 milionë lekë për “Rehabilitimin e zonës së ish-peshkimit”, për ta shndërruar këtë sipërfaqe të portit në vend parkimi për anijet dhe makinat e punonjësve të portit.
“Në këtë projekt synohet kthimi në punë i sheshit të ish-peshkimit dhe shfrytëzimit të tij për qëllime të ndryshme si ankorimin e anijeve në të thatë, për parkim të punonjëseve dhe automjeteve të ndryshme të portit etj”,– thuhet në raportin e vlerësimit të ndikimit në mjedis për këtë projekt.
Sheshi në fjalë është në gjendje jo të sistemuar, me inerte dhe mbeturina, ku në përfundim të punës synohet sistemimi i ambienteve të jashtme me platforma kaluese gjelbërimi, sistemimi i një ambienti të jashtëm për vendqëndrimin e automjeteve dhe aksesin në ambientin e ndërtesës nga rruga kryesore për automjete dhe këmbësorët me anë të murit rrethues.
APD thekson se në zonën ku do të zhvillohet projekti nuk do të ndërtohet objekt i ri, por është rehabilitues dhe vetëm do sistemojë dhe do rregullojë vendin përreth.
Kohëzgjatja e parashikuar e procesit të rehabilimit të kësaj zone do të jetë rreth 2 muaj për secilin lot, ndërsa kompanitë e interesuara kanë afat deri më datë 13 shtator të dorëzojnë ofertat.
