Kreu i Grupit Parlamentar të Partisë Demokratike Gazment Bardhi ka reaguar ndaj raportimeve se kompania fituese e koncesionit 60 milionë euro të Portit të Vlorës tani është në pronësi të një pensionisti punonjës i kompanisë Salillari. Bardhi akuzon drejtpërdrejt Kryeministrin Edi Rama dhe Ministren Belinda Balluku se qëndrojnë pas një skeme të sofistikuar vjedhjeje dhe zhvatjeje të fondeve publike.
Bardhi denoncon se skema e përdorur në koncesionin e Portit të Integruar në Triport Vlorë është e njëjtë me ato të përdorura në Aeroportin e Vlorës dhe Tunelin e Llogarasë. Tenderi i shpallur nga MIE më 10 Gusht 2021 me vlerë 60 milionë euro paracaktoi fituesin si një bashkim kompanish. Fituese u shpall oferta e bashkimit të pesë subjekteve tregtare të cilat do ta ndërtonin portin me paratë e tyre ndërsa qeveria do t’i paguante ato 60 milionë euro me këste pas përfundimit të punës.
Kulmi i skemës, sipas Bardhit, ndodhi kur menjëherë pas fitores kompanitë Agbes Construction Arconstudio dhe Besta i shitën kuotat e tyre tek shoqëria Premium Construction & Maintenance. Vlera e shitjes së 25% të aksioneve shkoi deri në shifrën qesharake prej 2500 eurosh. Shoqëria Premium Construction & Maintenance e cila u bë pronare e 92% të aksioneve rezulton të jetë një shoqëri me kapital fillestar prej vetëm 10 mijë lekë dhe e themeluar vetëm dy muaj para shpalljes së tenderit.
Bardhi e cilëson skandaloz faktin që pronari zyrtar i kësaj shoqërie rezulton të jetë shtetasi Hektor Agalliu një pensionist dhe punëtor i thjeshtë në firmën Salillari, një person pa eksperiencë në ndërtim. Kreu i Grupit Parlamentar të PD-së i bëri thirrje Prokurorisë së Posaçme SPAK që të hetojë menjëherë këtë procedurë si një skemë të pastër korruptive me dyshime serioze për pastrim parash të pista në sektorin publik jo vetëm për të ndëshkuar zyrtarët e korruptuar por edhe për të zbuluar se kush fshihet vërtet pas projektit 60 milionë euro.
Discussion about this post