Përplasje mes këshilltarëve bashkiakë të opozitës dhe kryebashkiakut Erion Veliaj në mbledhjen e Këshillit Bashkiak, ndërsa socialistët kanë miratuar me nxitim buxhetin për vitin 2024. Me një skenar të ngjashëm si ai i ndjekur nga Lindita Nikolli gjatë seancave plenare, edhe Romina Kuko, ka kaluar për votim projektbuxhetin, duke mbyllur mbledhjen në kohë record.
Romina Kuko, drejtuese e Këshillit Bashkiak, ka ndërprerë mbledhjen, ndërsa kryebashkiakut iu treguan një palë pranga “live” nga këshilltari i opozitës Tedi Blushi.
Gjesti simbolik i këshilltarëve të opozitës ka lidhje me aferën e inceneratorëve, për të cilën SPAK ka nisur hetimet dhe ka arrestuar një nga drejtorët e rëndësishëm të Bashkisë së Tiranës, Taulant Tusha, ndërkohë që vijojnë hetimet.
“Dhurata që meriton për Vitin e Ri për aferën e inceneratorëve
Prangat janë drejtësia për aferën e inceneratorit inekzistent të Tiranës dhe për qindra milionë euro të vjedhura përmes kësaj skeme kriminale.
Prangat janë simboli i ndëshkimit për keqmenaxhimin dhe vjedhjen e taksave tona në këto vite.
Prangat janë ndëshkimi për betonizimin dhe shkatërrimin e Tiranës.
Prangat janë shpagimi për shtëpitë e shembura në shkelje të ligjit, për gjobat e padrejta, për braktisjen dhe lënien në harresë të qytetarëve në nevojë dhe personave me aftësi të kufizuara.
Prangat janë simboli i drejtësisë, me paanësi dhe jo me regji!”, iu drejtua Blushi, kryebashkiakut.
Discussion about this post