Pas më shumë se 4 orë debatesh në sallën e Kuvendit, socialistët u tërhoqën nga qëndrimi i tyre për të zhvilluar të hënën seancën e posaçme parlamentare për dhënien e autorizimit për SPAK, që ka kërkuar arrestimin e Arben Ahmetajt.
Një mbledhje formale e Konferencës së Kryetarëve, pas propozimit të Taulant Ballës, ka bërë që deputetët e PS-së të pranojnë që seancën për të votuar mbi kërkesën e SPAK ta zhvillojnë paraditen e së premtes.
E ndërsa deri në momentin e fundit, deputetët e PS-së kanë mbrojtur tezën se e hëna është dita kur duhej të mbahej kjo seancë, pasi duhej njoftuar edhe deputeti Ahmetaj, por duhej përgatitur edhe raporti, duket se ata janë dorëzuar, duke afruar seancën me të paktën 72 orë.
Opozita kërkoi të mos humbej kohë deri të hënën për miratimin e kërkesës së SPAK, që do t’i hapte rrugë arrestit të ish-zv/kryeministrit. Me bindjen se kryeministri Rama po merr kohë për të negociuar me ish-vartësin e tij, demokrati Gazment Bardhi përcolli në foltore shqetësimin e shprehur me dyer të mbyllura nga drejtuesi i Prokurorisë së Posaçme.
“Kreu i SPAK e tha hapur që Arben Ahmetaj po intimidonte dëshmitarët, po prishte provat”, tha Bardhi duke cituar në këtë mënyrë shqetësimin që Altin Dumani ua ka bërë të ditur anëtarëve të Këshillit të Mandateve që morën në shqyrtim në dy seanca kërkesën e SPAK për arrestimin e deputetit.
Socialistët, me në krye Lindita Nikollën dhe herë pas here Toni Gogun, i janë referuar procedurave, duke përmendur edhe faktin se kërkojnë që procesi të jetë ligjërisht i drejtë, i pakontestueshëm, duke i dhënë kohë deputetit Ahmetaj që të paraqitet në seancë për të mbajtur i pari fjalën.
Dhe nëse i referohesh procedurës vërtet Ahmetaj ka të drejtë që ti drejtohet Kuvendit me një fjalim para se të votohet kërkesa, por prej ditësh thuhet se ai nuk ndodhet në Shqipëri.
Dhe në kulmin e debateve dhe akuzave të ndërsjellëta, ku në jo pak raste u kalua në fyerje personale, befas socialistët vendosin të “lëshojnë pe” nga qëndrimi i tyre. Taulant Balla propozon që të mblidhet Konferenca e Kryetarëve dhe ti japë drejtim çështjes që diskutohet.
Paralelisht me debatet për Ahmetajn dhe kërkesën e SPAK, diku në një nga zyrat e Parlamentit, anëtarët e Komisionit të Ligjeve, të gjithë deputetë të PS-së, në mungesë të atyre të opozitës, vendosin të miratojnë draftin për legalizimin e kanabisit për qëllime mjekësore dhe industriale.
Drafti miratohet me shumicën e votave të anëtarëve, ndërsa Pandeli Majko dhe Fatmir Xhafaj abstenojnë, duke bërë një dallim nga kolegët e tyre të PS-së. Ndoshta vota abstenim e Xhafajt ishte shkaku që ai u përfshi në një debat me Erion Braçen, që u fiksua nga kamerat që monitoronin seancën, por pa mundur të zbardhin shkakun e vërtetë.
Dhe për tu kthyer te debati i ditës, ai mbi ish-zv.Kryeministrin Arben Ahmetaj, tërheqja e deputetëve të PS-së, mund të ketë ndodhur pas një “urdhëri” në distancë nga Kryeministri, i cili nuk preferoi të ishte në seancë, por qëndronte aktiv në rrjetet sociale, duke komentuar zhvillimet në Parlamentin e Kosovës. Sërisht Rama ka këshilluar politikanët në Kosovë, ka dënuar përplasjet mes deputetëve apo sulmet ndaj Kryeministrit Albin Kurti, edhe pse prej javësh ka marrë “flamurin” e akuzave ndaj tij.
Duket se “urdhëri” i Ramës ka qenë i prerë, përsa kohë Balla ka kërkuar nga Nikolla, që deri në atë moment mbropnte procedurat dhe rregulloren, që të bëhej një pushim, dhe çështja të zgjidhej.
Me rinisjen e seancës u vendos që votimi mbi kërkesën e SPAK të bëhej të premten në orën 10:00, në një seancë të posaçme, ndërsa çuditërisht deputetët e PS-së nuk patën më “hallin” për njoftimin e deputetit Ahmetaj dhe as për procedurat.
Discussion about this post