Kryeministri Edi Rama ka shkarkuar sot pak orë para mbledhjes së Asamblesë Kombëtare të PS-së Delina Ibrahimajn nga posti i ministres së Financave. Lajmi u njoftua në media, që i referoheshin burimeve qeveritare, madje u paraqit si një shkarkim gjatë mbledhjes së Qeverisë.
Ibrahimaj prej shtatorit të 2021 drejtonte Ministrinë e Financave, pozicion që më parë mbahej nga Anila Denaj.
Më parë Ibrahimaj ka mbajtur detyrën e Drejtoreshës së Përgjithshme të Tatimeve dhe disa herë është akuzuar se me mosveprimet e saj ka favorizuar skemat e mashtrimit me TVSH-së, çështje e cila shpesh është kthyer në qendër të vëmendjes edhe në sallën e Kuvendit gjatë debateve politike. Gjithsesi kjo çështje nuk është se i ka ndikuar Ibrahimajt për të vijuar karrierën politike deri ditën e sotme, kur Rama vendosi shkarkimin.
Zyrtarisht nuk dihet ende një arsye pse Kryeministri morri këtë vendim, edhe pse janë raportuar disa herë përplasje mes saj dhe Edi Ramës, apo zv.Kryeministres Belinda Balluku.
Pak muaj më parë u raportua se Ibrahimaj kishte paraqitur dorëheqjen, por më pas ajo e përgënjeshtroi, ndërsa media raportonte se pritej largimi i saj si ministre.
Gjithashtu janë raportuar detaje mbi mënjanimin që i është bërë Ibrahimajt nga strukturat e PS-së, ku fillimisht ajo ishte koordinatore për Njësinë nr 5 në Tiranë, dhe më pas pati një largim ose tërheqje të saj.
Një nga momentet që ka tërhequr vëmendjen , të paktën publike, ishte marrëveshja e nënshkruar për Portin e Durrësit mes Qeverisë dhe kompanisë Alabaar, ku pavarësisht pozicionit të rëndësishëm që kishte Ministria e Financave, Ibrahimaj “preferoi” të qëndronte në hije, kur fare mirë mund të kishte një rol protagonist, përsa kohë Ministria që ajo drejtonte, të paktën në letra, kishte 33 % të projektit. Ibrahimaj ka qenë një nga mbrojtëset më të zjarrta të projektit, por në momentin final, nuk dihet nëse zgjodhi vetë të qëndronte në “hije” apo e mënjanuan.
E ndërsa lajmi për shkarkimin e Ibrahimajt u shpërnda me shpejtësi nga stafi i Kryeministrit si një vendim, nuk dihet nëse Edi Rama do të realizojë ndryshimet në kabinetin qeveritar, veçanërisht pas skandaleve të fundit, qoftë me rastin e Safet Gjicit, Rrajat e Krujës apo arratisjen nga drejtësia të ish-zv.Kryeministrit Arben Ahmetaj.
Në Asamblenë e 2018, Rama njoftoi në atë kohë largimin e 3 ministrave, ndërkohë sot zgjodhi skenarin e njoftimit paraprak të largimit të një prej anëtarëve të kabinetit qeveritar, pak orë para mbajtjes së mbledhjes së forumit më të lartë politik të Partisë Socialiste.
Ndoshta me njoftimin për shkarkimin e Ibrahimajt, Rama mund të “mbyllë” procesin e ndryshimeve në Qeveri, edhe pse raportohet për të paktën dy ministre që mund të “lëshojnë” karriget qeveritare: Frida Krifca, ministre e Bujqësisë, dhe Olta Xhaçka, ministre e Jashtme.
E para u vu në qendër të kritikave pas njoftimit zyrtare nga BE lidhur me pezullimin e fondeve për bujqësinë shqiptare, parashikuar nga programet IPARD, pas një hetimi të OLAF. Ndërsa në rastin e Xhaçkës vijon një betejë për mandatin e saj si deputete, pasi opozita ka ngritur pretendime se ndodhet në konflikt interesi, për shkak se bashkëshorti i saj është shpallur “investitor strategjik” nga Qeveria, ku edhe vetë Xhaçka është ministre.
Nuk dihet nëse Rama do i shkojë deri në fund skenarit të ndryshimeve në Qeveri, ashtu sikundër është paralajmëruar, apo në këtë fund korriku do të mjaftohet me largimin nga detyra të Delina Ibrahimajt, ministrja e dytë e shkarkuar nga Kryeministri, pas ministrit të Brendshëm, Bledi Çuçi.
Në mbledhjen me dyer të mbyllura, e cila pritet të marrë në analizë funksionimin e strukturave të PS-së, punën e drejtuesve të Qarqeve, por edhe Qeverisë, Rama pritet të mbajë një fjalim, ku sipas raportimeve pritet të adresojë kritika, por edhe të kërkojë marrjen e përgjegjësive.
Discussion about this post