Ish-Sekretari amerikan i Shtetit, Mike Pompeo, mbërriti dje në Tiranë, në kuadër të 100-vjetorit të marrëdhënieve diplomatike Shqipëri-SHBA.
I pari që takoi në Tiranë ishte kreu i Grupit Parlamentar të PS-së, Taulant Balla. Mike Pompeo e viziton për herë të parë Shqipërinë. Burime konfidenciale thanë për gazetën “Panorama” se ishSekretari amerikan i Shtetit, nën presidencën e Donald Trump, i cili po qëndron në “Mac Albania Hotel”, do të ketë një mëngjes pune me Kryeministrin Rama.
Gjithashtu, ai do të jetë prezent gjatë nënshkrimit të marrëveshjes për deversifikimin e tregut të gazit, një nga çështjet më të debatueshme në Europë, pas nisjes së agresionit rus ndaj Ukrainës. Marrëveshja për gazin që pritet të nënshkruhet sot, merr një rëndësi strategjike që e kalon hapësirën shqiptare dhe atë ballkanase dhe që lidhet me pavarësinë e Europës nga gazi rus.
Më pas, ish-Sekretari amerikan i Shtetit do të nderohet me titullin “Doctor Honoris Causa” nga Universiteti i Tiranës. Por ish-zyrtari lartë i administratës Trump do të marrë pjesë dhe në konferencën e organizuar me rastin e 100-vjetorit të marrëdhënieve Shqipëri-SHBA, ku ai do të mbajë dhe një fjalë. Konferenca organizohet nga kryetari i Grupit Parlamentar socialist, Taulant Balla, në kuadër të “Javës Amerikane”.
“Ditën e hënë, në orën 10:00, në Hotel ‘Sheraton’, Kuvendi i Shqipërisë, me nismën e Grupit Parlamentar të Partisë Socialiste dhe nën kujdesin e kryetarit të Grupit, z. Taulant Balla, do të organizojë një veprimtari kushtuar 100-vjetorit të vendosjes së marrëdhënieve diplomatike Shqipëri-SHBA. Në këtë veprimtari do të përshëndesë kryetarja e Kuvendit, znj. Lindita Nikolla, dhe personalitete të tjera të larta”, thuhet në njoftim.
AGJENDA
Gazeta Panorama ka zbuluar agjendën e Konferencës që zhvillohet në kuadër të “Javës Amerikane” për 100- vjetorin e marrëdhënieve Shqipëri-SHBA, ku do të marrë pjesë edhe ish-Sekretari amerikan i Shtetit, Mike Pompeo.
Në këtë konferencë janë ftuar edhe Enkelejd Alibeaj, i cili do të flasë në sesionin e parë bashkë me ish-Sekretarin e Shtetit, zonja Kim dhe Kryeparlamentarja Nikolla.
Ndërsa në sesionin e dytë të konferencës, që do të moderohet nga zonja Kodheli, do të flasin edhe ministrja Balluku, deputetët Etilda Gjonaj, Ferdinand Xhaferri, Jorida Tabaku, Niko Peleshi dhe Klodilda Bushka, si dhe Prokurori i Përgjithshëm, Olsian Çela. I ftuar është edhe deputeti demokrat Agron Gjekmarkaj.
KUSH ËSHTË MIKE POMPEO
Emërimi i Mike Pompeo në mars 2018 si Sekretari i ri amerikan i Shtetit përflitej prej kohësh, pasi drejtori i CIA-s është konsideruar gjithnjë, si një nga njerëzit më besnikë të Presidentit amerikan Trump. Presidenti amerikan, Donald Trump, zyrtarizoi zëvendësimin e Rex Tillerson në postin e Sekretarit të Shtetit, me drejtorin e CIA-s Majk Pompeo.
Emërimi i Pompeut u bë një moment shumë të rëndësishëm për sigurinë kombëtare amerikane, në kuadër të negociatave me Korenë e Veriut. Presidenti Trump tha se e kishte marrë personalisht këtë vendim i bindur se drejtori i CIA-s do të kryente një punë fantastike në detyrën e tij të re.
Majk Pompeo u diplomua si i pari i klasës së tij në Uest Point dhe ka kryer shërbimin ushtarak, ndërsa më pas u diplomua me notat maksimale në Harvard për drejtësi. Mike Pompeo ka qenë anëtar i Kongresit në radhët e republikanëve duke qenë pjesë e radhëve më të ashpra para se Presidenti Donald Trump ta emëronte drejtor të CIA-s dhe më pas Sekretar amerikan të Shtetit.
Prej kohësh Pompeo konsiderohej si një nga njerëzit më besnikë të Tramp dhe atij i janë dhënë meritat për gjetjen e një ekuilibri të ri në CIA-s në menaxhimin e marrëdhënieve mes agjencisë së spiunazhit dhe Presidentit amerikan, i cili krahasonte shërbimet amerikane të inteligjencës me nazistët.
Pompeo konsiderohej më agresiv ndaj Kremlinit në krahasim me kreun e Shtëpisë së Bardhë dhe në të kaluarën e ka cilësuar Presidentin Putin si një lider të rrezikshëm./Panorama.al
Discussion about this post