Shtetet e Bashkuara kanë arrestuar presidentin e Venezuelës, Nicolas Maduro, në kuadër të një operacioni sekret ushtarak të planifikuar për muaj me radhë nga agjencitë amerikane të inteligjencës dhe ushtria, raportojnë media të huaja.
Sipas burimeve amerikane të cituara nga BBC dhe media të tjera ndërkombëtare, agjentët amerikanë kishin monitoruar prej kohësh çdo lëvizje të Maduros, përfshirë vendndodhjen, rutinën e përditshme dhe skemën e sigurisë. Një rol kyç në mbledhjen e informacionit dyshohet se e ka pasur edhe një burim brenda strukturave shtetërore venezueliane.
Trupa elitare amerikane kishin ndërtuar një kopje të saktë të banesës së sigurt të Maduros në Karakas, për të simuluar ndërhyrjen në detaje. Sipas raportimeve, Kongresi amerikan nuk ishte informuar paraprakisht për misionin.
Urdhri për nisjen e operacionit u dha nga presidenti i SHBA-së, Donald Trump, të premten në mbrëmje, rreth orës 22:46 (ora lokale). Ndërhyrja u zhvillua gjatë natës dhe zgjati mbi dy orë, duke përfshirë veprime të koordinuara nga ajri, toka dhe deti.
Pas arrestimit, Maduro u transferua në Shtetet e Bashkuara dhe aktualisht ndodhet në një qendër paraburgimi në Brooklyn, Nju Jork. Ai përballet me akuza që lidhen me trafik droge dhe armësh, të cilat i ka mohuar më herët. Mediat amerikane kanë publikuar edhe një fotografi ku ai shfaqet me pranga, i rrethuar nga agjentë federalë, pas mbërritjes në Nju Jork.
Gjatë një konference për shtyp në Mar-a-Lago, Trump e cilësoi operacionin si “brilant”, duke deklaruar se synimi ishte, sipas tij, “çlirimi i popullit venezuelian”. Ai shtoi se SHBA synon të marrë përkohësisht përgjegjësinë për administrimin e Venezuelës deri në një tranzicion politik “të drejtë dhe të ndershëm”.
Ndërhyrja ka nxitur reagime të forta ndërkombëtare. Presidenti i Brazilit, Lula da Silva, e cilësoi arrestimin me forcë të liderit venezuelian si “një precedent jashtëzakonisht të rrezikshëm”, duke paralajmëruar për rritje të tensioneve politike në Amerikën Latine dhe më gjerë.
Discussion about this post