Nisma e qeverisë për të rritur taksën e pronës ka ngjallur debate. Ndërsa Ministria e Financave nuk jep detaje, ekonomisti Zef Preçi rendit disa pika që duhen pasur parasysh nga qeveria, në mënyrë që taksa të mos varfërojë familjet.
Nga janari qytetarët pritet të përballen me rritje të taksës së pronës. Rritja vjen me ndryshimin e përllogaritjes, duke kaluar nga sipërfaqja tek vlera e pronës. Me rivlerësimin e pronave të paluatjshme këtë vit, çdo banesë është shoqëruar me rritje të vlerës, ndërsa edhe masa e takses pritet të rritet.
Mnistria e Financave nuk bën të ditur vlerat që po diskutohen në konsultimet për paketën fiskale, ndërsa është i qartë objektivi i qeverisë për të rritur të ardhurat e saj nga kjo taksë.
Eksperti i ekonomisë, Zef Preçi, kërkon të shikohet me kujdes një taksë e tillë, që prek të gjitha shtresat e popullsisë.
Një taksim më i drejtë, sipas Preçit, nis pas përfundimit të kadastrës.
Ndërkohë, çdo ndryshim vlere sipas tij, duhet të ketë parasysh të drejtën bazë te strehimit.
Si çdo politikë që rrit nivelin e taksave, nevojitet trajtim lehtësues për shtresa të veçanta siç janë familjet e reja.
Shqetesimi se taksa e pronës mund të jetë shumë më e lartë se aktualisht, vjen për faktin se banesat e rivlerësuara janë më të shtrenjta, por edhe banesat e reja që po ndërtohen kanë çmim më të lartë për shkak të taksës së infrastrukturëes prej 8% të vlerës së pronës.
Pak ditë më parë, në një konferencë për shtyp, ministri i Financave konfirmoi se ministria e ka të detajuar draftin për taksën e pronës. Ai hodhi poshtë zërat për diferencim në taksimin e shtëpisë së dytë dhe të tretë, ndërsa konfirmoi se taksa do të llogaritet në baze të vlerës reale të banesës dhe jo vlerave minimale të llogaritura deri më tani.
https://youtu.be/KvHQlI0dgKQ
