Mosmarrja e pagave prej 7 muajsh dhe reduktimi i stafit ngriti në protestë punonjësit e kompanisë së sigurimit të Bankers Petroleum, “SHPSF Serjani”, të cilët kërkojnë zgjidhje urgjente për situatën e tyre.
Nga 380 punonjës, tashmë kjo kompani ka vetëm 120, të cilët pohojnë se prej 7 muajsh nuk iu janë dhënë pagat.
Punonjësit kërkojnë ndërhyrje të menjëhershme nga drejtuesit e kompanisë dhe institucionet përgjegjëse, duke theksuar se puna e tyre vazhdon, por pa pasur asnjë garanci financiare.
Punonjësit e kompanisë së sigurimit të Bankers Petroleum paralajmërojnë se do të vazhdojnë protestat paralelisht me punën, deri në momentin kur problematika e tyre të marrë një zgjidhje përfundimtare. Ata kërkojnë shlyerjen e pagave të prapambetura dhe siguri për të ardhmen e punësimit.
Protestuesit thonë se janë zhytur në borxhe, kredi dhe detyrime të papërballueshme, ndërsa familjet e tyre po përballen me pasiguri sociale dhe ekonomike. Ata kërkojnë ndërhyrje urgjente nga drejtuesit e Bankers Petroleum dhe institucionet përgjegjëse, duke theksuar se situata ka kaluar çdo limit durimi.
“Po punojmë çdo ditë, por pa paga. Jemi të zhytur në borxhe, askush nuk na jep përgjigje konkrete.”
Ndërkohë, punonjësit pohojnë se gjatë gjithë kësaj periudhe kanë qenë në komunikim të vazhdueshëm me drejtuesit e kompanisë, por, sipas tyre, janë mbajtur vetëm me premtime boshe dhe shpresa të rreme, pa afate dhe pa zgjidhje reale.
Përballë kësaj situate alarmante, protestuesit paralajmërojnë se do të vijojnë protestat paralelisht me punën, deri në momentin kur kërkesa e tyre e vetme dhe legjitime të marrë zgjidhje: pagesa e pagave të prapambetura dhe garanci për të ardhmen e punësimit.
Discussion about this post