Prej shumë vitesh 14 familje të fshatit Lapardha në Berat vuajnë për ujë të pijshëm, pavarësisht premtimeve në kohë fushatash. Banorët e fshatit u ankuan në Fiks Fare se qeveria i gënjen çdo herë se ka në plan një projekt për zonën e tyre, por deri më tani asgjë konkretet.
Më 22 shkurt 2021 Bashkia e Beratit mori një projekt për të pajisur me sistemin e ujit të pijshëm dhe matësa banorët e fshatit Duhanas, Lapardha 1, Otllak dhe Orizaj. Edhe pse kanë kaluar më shumë se 6 muaj që nga koha e prezantimit të projektit, punimet nuk kanë nisur akoma.
Të revoltuar për këtë situatë banorët shprehen se, kur u prezantua projekti i bashkisë në shkurt ishin të përfshirë dhe ta, por në të vërtet janë pajisur me matësa dhe furnizohen me ujë vetëm familjet që janë në pjesën e sipërme të lagjes që ndodhen në anë të rrugës kryesore të fshatit. Ata tregojnë se janë ankuar vazhdimisht në bashki për përgjigja e vetme që marrin është se ka mungesë fondesh.
“Për ne që jemi më në thellësi të fshatit nuk u bë asgjë. Kemi pyetur punonjësit që po merreshin me këto rregullime dhe na kanë thënë se nuk kemi urdhër për lagjen tuaj. Jemi ankuar në bashki, por na është përgjigjur se nuk ka fonde”, shprehet një banor.
Një tjetër banor tregon se mbajnë ujin me bidonë e biçikleta nga një çezmë e fshatit dhe kjo situatë është bërë e padurueshme, sidomos gjatë dimrit. “Lagjja është e vjetër paraardhësit tanë kanë më shumë se 100 vite këtu, tani që thamë shyqyr që po na vjen uji në shtëpi na përjashtuan. Kemi një jetë që mbajmë ujë me krah dhe biçikleta nga shtëpitë tona deri tek çezma e fshatit”, ankohen banorët.
Ata i bëjnë thirrje bashkisë që të mos zvarrisë më projektin, por të fillojë sa më parë nga puna.
E.H/ gijotina.com/
