Anëtarja e këshillit bashkiak të Tiranës, Ilda Zhulali, ka kritikuar ashpër projektin e ushqimit falas në shkollat publike, duke e cilësuar atë një tjetër mashtrim të kryebashkiakut Erion Veliaj. Sipas saj, ky premtim nuk ka as buxhet, as infrastrukturë dhe nuk ofron një zgjidhje reale për nxënësit e Tiranës.
Zhulali kujton se projekti u premtua vite më parë si pjesë e nismës “Bëjmë detyrat e shtëpisë”, por përfundoi i zbatuar në një formë të kufizuar dhe joefektive. Aktualisht, në vend që të ofrohet ushqim në shkolla, familjet e një grupi të vogël nxënësish marrin një kompensim financiar minimal. Ajo thekson se ky model nuk arrin të mbajë fëmijët në shkollë, nuk eliminon rrezikun e braktisjes dhe nuk garanton një vakt të shëndetshëm.
Për më tepër, ky projekt nuk është parashikuar në buxhetin e Bashkisë së Tiranës për vitin 2025, duke e bërë të pamundur zbatimin e tij në një shkallë më të gjerë. Sipas Zhulalit, premtimi për ushqimin falas mbetet një tjetër “fantazmë” në listën e projekteve të parealizuara nga Erion Veliaj.
Postimi i plotë:
Mashtrimi i radhës i Erion Veliajt, një premtim bosh, pa buxhet, pa infrastrukturë dhe pa zgjidhje për banorët e Tiranës.
Projekti i ushqimit falas në shkollat publike të Tiranës është një tjetër fantazëm që do të përndjekë gënjeshtarin Erion Veliaj.
Për ata që nuk e mbajnë mend, ushqimi falas në shkollat publike të Tiranës, u premtua dikur nga Erion Veliaj në formën e projektit “Bëjmë detyrat e shtëpisë”.
I mbetur prej vitesh në letër, më në fund u duk se do të vihej në zbatim në fund të vitit të kaluar. Por, në vend të ofrimit të ushqimit në shkolla për 114 nxënës, përfundoi si një kompensim financiar për disa familje në nevojë, duke devijuar krejtësisht nga qëllimi fillestar që synonte të shpëtonte fëmijët nga rruga dhe të nxiste ndjekjen e shkollës përmes ushqimit falas.
Fakte
1. Projekti “Bëjmë detyrat e shtëpisë” mbulon vetëm 114 nxënës të përzgjedhur nga 7 shkolla të Tiranës (Ardian Klosi, Hasan Tasin, Gjergj Fishta, Skënder Luarasi, Androkli Kostallari, Dhora Leka, Konferenca e Pezës dhe Ramazan Jarani). Ky numër është jashtëzakonisht i kufizuar në krahasim me 54.777 nxënës që ndjekin shkollat 9-vjeçare publike në Tiranë.
2. Nuk i shërben qëllimit: Në vend që të ofrohet ushqim real në shkolla, projekti, që nga dhjetori 2024, zbatohet si një kompensim financiar prej 222.3 lekë në ditë për familjet e 114 nxënësve. Pra fëmijët NUK shpëtohen nga rruga, NUK qendrojnë realisht në shkollë pas mësimit për t’u ushqyer dhe bërë detyrat, dhe ndërkohë shtohen burokracitë për familjet që marrin bonusin ushqimor. Padyshim që kjo shumë është edhe krejt e pamjaftueshme për të mbuluar nevojat ushqimore të një fëmije në mënyrë të duhur.
3. Mungesa e buxhetit: Ushqimi falas NUK është parashikuar në buxhetin e Bashkisë së Tiranës për vitin 2025. Zëri për kompensimin ushqimor është vetëm 19.451.250 lekë. Për të mbuluar 54.777 nxënësit e Tiranës, do të nevojiteshin rreth 2.2 miliardë lekë në vit, një shifër larg buxhetit të parashikuar.
4. Mungesa e Infrastrukturës:
Projekti nuk mund të zbatohet për shkak të mungesës së infrastrukturës në shkollat publike të Tiranës: Shumë shkolla në Tiranë funksionojnë me dy turne, duke kufizuar kohën dhe hapësirën e disponueshme për ushqimin e fëmijëve. Shkollat nuk kanë mensa, por as kushte ngrohjeje/ftohjeje, ose kushte higjienike dhe sanitare të nevojshme për të ofruar ushqim në mënyrë të sigurt dhe të organizuar.
Erion Veliajn e ndjekin disa fantazma nëpër Tiranë. Fantazmave të incineratorit, impjantit të ujërave të zeza, dhe 1 milionë pemëve, tashmë do t’u shtohet dhe një tjetër – kësaj here pa buxhet, pa infrastrukturë dhe gjithmonë PA zgjidhje për banorët e Tiranës.
Discussion about this post