Prençi: Në tetor do të kemi edhe ministra të tjerë të arrestuar

Ish-këshilltari në Presidencë për Mbrojtjen Civile dhe ish-drejtuesi i lartë i Policisë së Shtetit, Shemsi Prençi, deklaroi sot se shumë shpejt do të arrestohen edhe ministra të tjerë. Ai shtoi se kreu i SPAK-ut, Altin Dumani është kërcënuar vetëm nga një njeri, dhe ky është pikërisht Rama.

“Ju i keni parë të gjithë ministrat që kanë shkuar te dera e SPAK-ut. Atje te SPAK-u nuk të thërrasin kot. Atje të thërrasin edhe për dëshmitar. Por Rama është munduar që një pjesë të tyre t’i mbrojë, t’i veshë me pushtet, që t’i bëjë të paprekshëm kundër SPAK-ut, por fatmirësisht, për fatin e shqiptarëve, SPAK mund të ndikohet nga Rama, por nuk është i kapur 100% nga Rama sepse partneri ynë strategjik e ka dorën e fortë tek SPAK-u. E ka të fortë.

Nëse ju keni dëgjuar ditët e fundit “jo u kërcënua kreu i SPAK-ut” etj. etj., kreu i SPAK-ut u kërcënua nga Rama! Nga kryeministri! Se kryeministri vajti në spital dhe i tha: Nuk mund të preket koncesioni i Sterilizimit!

Problemi qëndron se kryeministri e kërcënoi SPAK-un, i tha që atje ku kam dorë unë, ju nuk mund të sekuestroni dhe konfiskoni pasuritë e këtyre kompanive me të cilat vjedh unë dhe ministrat që mbroj unë.

Pra, në këtë pikëpamje, shqiptarët e kanë lexuar që SPAK-un dhe kreun e SPAK-ut, Altin Dumanin, e ka kërcënuar kryeministri i Shqipërisë. Këtë mesazh e ka marrë ambasada amerikane dhe Departamenti i Shtetit.

Ngadalë -ngadalë, po SPAK po e bën punën e vet. Nuk është e lehtë. Mos harroni se jemi në një vend ku krimi dhe korrupsioni në 32 vjet (jo se s’ka pasur goditje, ka pasur goditje edhe nga strukturat e drejtësisë së mëparshme) por SPAK-u sot ka provuar që qeverinë aktuale e ka goditur në thelb. I ka arrestuar dhe vënë para përgjegjësisë tre ministra, një ish-zvkryeministër.

Jo në shtator, por deri nga mesi i tetorit do të kemi ministra të tjerë të arrestuar.

Nuk mundet t’i shpëtojë drejtësisë Ilir Beqaj!

Nuk mund të shpëtojë Olta Xhaçka me atë ç’ka bërë me pronat e ushtrisë, sepse heqja nga plani i përhapjes së vendkomandave dhe reparteve të ushtrisë në vendet më strategjike të bregdetit të një ushtrie vend anëtar i NATO-s, pa kundrafirmën e Presidentit të Republikës në bazë të ligjit. Dhe këtë nuk e ka bërë Olta Xhaçka vetë.”, tha Prençi.