Tri ditë pas lajmeve që tronditën opinionin publik për arrestimin e drejtoreshës së SHISH-it, Vlora Hyseni, dhe ndërsa zërat për mbledhjen e Këshillit të Sigurisë Kombëtare po bëhen gjithnjë e më të fortë, Presidenca më në fund dha një shenjë jete.
Jo, nuk u thirr Këshilli i Sigurisë Kombëtare. Nuk pati as ndonjë qëndrim të fortë publik. As ndonjë shpjegim që të ndihmonte publikun të kuptonte çfarë po ndodh në një prej institucioneve më të rëndësishme të sigurisë së vendit.
Pati një takim.
Presidenti i Republikës, Bajram Begaj priti sot në takim Ministrin e Brendshëm, Ervin Demo së bashku me Drejtorin e Përgjithshëm të Policisë së Shtetit, Skënder Hita, si dhe Drejtorin e komanduar të SHISH-it, Elvis Lila
Sipas njoftimit të presidencës, Begaj u informua dhe diskutoi me ta mbi çështje të aktualitetit skandalit të SHISH dhe shkarkimit të Vlora Hysenit, e cila ndodhet në masë arresti nga SPAK për nxjerrje të sekretit shtetëror dhe bashkëpunim me persona të skeduar si të dyshuar për vepra të rënda penale, konkretisht Ergys Agasi.
Situata politike e krijuar në vend pas arrestimit të kreut të SHISH, Vlora Hyseni, ka nxitur debate në lidhje me sigurinë kombëtare. Skandali ka shkaktuar debate dhe përplasje edhe në seancën plenare që po zhvillohet në Kuvend, ku demokratët kërkojnë debat me Ramën lidhur me këto zhvillime.
Discussion about this post