Presidenti i Republikës, Bajram Begaj, ka reaguar ashpër pas vrasjes së gjyqtarit Astrit Kalaja, i cili u ekzekutua në krye të detyrës në një ngjarje që ka tronditur opinionin publik dhe institucionet e drejtësisë në vend.
Në një deklaratë për mediat, kreu i shtetit u shpreh “thellësisht i tronditur” dhe dënoi me “gjuhën më të ashpër” këtë akt të rëndë, të cilin e cilësoi si të patolerueshëm dhe si një sulm brutal ndaj jo vetëm një gjyqtari të shquar, por ndaj gjithë sistemit të drejtësisë.
“Ky sulm i tmerrshëm ndaj gjyqtarit Astrit Kalaja, por edhe ndaj drejtësisë si të tillë, duhet të përballet nga gjithë shoqëria me përbuzjen dhe mospajtimin më të thellë, sepse ky akt është atentat makabër ndaj vetë sistemit, tek i cili ka themelet bashkëjetesa dhe paqja sociale,” – u shpreh Presidenti Begaj.
Në mesazhin e tij, Presidenti i Republikës i shprehu ngushëllimet më të sinqerta familjes së gjyqtarit Kalaja dhe kolegëve të tij, duke theksuar se shteti dhe shoqëria shqiptare duhet të qëndrojnë të bashkuar në mbrojtje të drejtësisë dhe të rendit kushtetues.
“Në emër të shtetit i gjendem pranë familjes së të ndjerit dhe kolegëve të tij të afërt e të largët, si dhe shpreh solidaritetin e plotë të shqiptarëve me dhimbjen e pakufishme për humbjen,” – përfundon reagimi i Presidentit Begaj.
Discussion about this post