Presidenti i Besëlidhjes Gjok Noka ka folur për humbjen në Burrel. Besëlidhja pësoi tre gola në “Liri Ballabani” dhe sipas presidentit, fajin e kishte finalja e… “Big Borther VIP”.
Numri një i klubit nuk është kursyer në analizë, duke kritikuar ashpër të tijtë. Kjo ka qenë madje analiza më e ashpër që është zhvilluar ndonjëherë pas një disfate.
Hapur u ka kërkuar që të reflektojnë sa janë në kohë, ndryshe do të bien nga kategoria. Ai pohon se ekipi nuk ishte kurrkund dhe në fushë pa vetëm futbollistët që shëtitën fanellën dhe logon.
Kreu i lezhjanëve është i shqetësuar për luhatjet e vazhdueshme dhe shpërfytyrimit që pësuan ndaj matjanëve, ia gjen arsyen. “Fazën e dytë e nisëm deri diku mirë. Morëm 6 pikë në katër ndeshje.
Kjo mjaftoi për të dalë nga ujërat e turbullta, ku kishim rënë për disa javë. Ngritja e ekipit në mënyrë progresive na ngrohu, por gjithçka u rrëzua në Burrel. Ishte një ndeshje që ekipi nuk e ka zhvilluar kurrë.
Në këtë përballje, skuadra u shpërfytyrua që në nisje. Në fushën e ‘Liri Ballabanit’ nuk ishte Besëlidhja, por vetëm fanellat me logon e saj sa për identifikim.
Që të premten futbollistët nuk e kanë pasur fare mendjen te transferta që kishin me matjanët, por te finalja e ‘Big Brother VIP’. Jam i sigurt që kjo ka ndikuar fuqishëm në atë humbje”, tha fillimisht Noka.
Discussion about this post