Bota e futbollit është tronditur sërish nga akuzat për ngacmim seksual. Këtë herë bëhet fjalë për Noel Le Graet, president i Federatës franceze të futbollit. Ngjarja u zbulua në ditët e para të shtatorit nga Revista So Foot. Drejtuesi 81-vjeçar, i cili mban postin e kreut të futbollit francez prej vitit 2011, ka reaguar duke paditur revistën franceze për shpifje.
Ai është takuar mëngjesin e sotëm me ministren e Sporteve në Francë. Amelie Oudea-Castera ka urdhëruar nisjen e hetimeve për një rast të tillë menjëherë pas bisedës së kryer me presidentin e FFF.
Bëhet fjalë për një “mision kontrolli” që do të kryhet nga organi shtetëror i inspektimit përgjegjës për sportin në Francë. Le Graet akuzohet se ka ngacmuar seksualisht disa femra që punojnë në Federatë, veprim për të cilin mund ta pësojë keq përpara fillimit të Kupës së Botës.
Franca zbarkon si ekipi kampion në fuqi në Katar. Botërori do të zhvillohet në periudhën 20 nëntor-18 dhjetor, teksa skuadra e Deschamps është pjesë e grupit D bashkë me Danimarkën, Australinë dhe Tunizinë.
Discussion about this post