Presidenti i La Ligës, Javier Tebas, ka shtuar dozën e kritikave ndaj presidentit të FIFA-s, Gianni Infantino, mes tensioneve të fundit që kanë përfshirë futbollin botëror.
Në një intervistë për të përditshmen italiane La Repubblica, Tebas u shpreh se Infantino nuk ka qenë asnjëherë personi i duhur për të drejtuar FIFA-n, duke e akuzuar për mungesë vizioni dhe përgjegjësie.
“E kam thënë këtë prej vitesh. Gianni Infantino nuk ka qenë kurrë i denjë për të udhëhequr futbollin botëror. Unë shoh një person arrogant, thellësisht injorant për pasojat që vendimet e marra sot do të kenë në futbollin e së nesërmes”, deklaroi Tebas.
Deklarata e kreut të La Ligës vjen në një moment delikat për Infantinon, i cili është përballur me kritika të forta pas planit të dështuar për hapjen e operacioneve komerciale të FIFA-s ndaj investitorëve privatë.
Projekti u tërhoq pas kundërshtimit të UEFA-s, CONCACAF-it, AFC-së dhe një numri të madh federatash kombëtare.
Tebas ka qenë prej kohësh një nga kritikët më të ashpër të politikave të FIFA-s, duke kundërshtuar zgjerimin e kalendarit ndërkombëtar dhe organizimin e turneve të reja, të cilat sipas tij dëmtojnë ligat kombëtare dhe futbollistët.
Komentet e tij pritet të shtojnë edhe më shumë presionin mbi Infantinon, ndërsa presidenti i FIFA-s përballet me një nga periudhat më të vështira të mandatit të tij.
Discussion about this post