Kryetari i Grupit Parlamentar të PD, Alfred Rushaj dhe nënkryetarja e PD, Jorida Tabaku zhvilluan një takim me presidentin e NDI, Derek Mitchell dhe Drejtorin e Përgjithshëm të NDI për Europën Qendrore dhe Lindore, Robert Benjamin.
Takimi i tyre pati në fokus rëndësinë e Vettingun në politikë dhe ndryshimet kushtetuese që PD ka kërkuar në Parlament si një mjet për të përforcuar më tej demokracinë në vend. Përfaqësuesit e opozitës u shprehën se janë plotësisht në mbështetje të krijimit të këtij organizmi, përmes një procesi të rregullt dhe gjithëpërfshirës së bashku me opozitën.
Ata gjithashtu u shprehën se komisionet parlamentare po përdoren nga opozita për të pasur nën kontroll qeverinë, sikundër informuan presidentin e NDI dhe Drejtorin për Europën Qendrore dhe Lindore për komisionet hetimore që ka ngritur opozitar.
Rushaj falenderoi presidentin Mitchell për ndihmën që NDi i ka dhënë jetës parlamentare në Shqipëri dhe veçanërisht PD-së. Ndërkohë që, Tabaku shprehu vlerësime në ndihmën që NDI ka dhënë për të rinjtë e PD dhe gjithashtu për zonjat në këtë forcë politike.
Mitchell dhe Benjamin u njohën gjithashtu me procesin e krijimit të Institutit Parlamentar, një gur themeli në lidhje me transparencën edhe gjithë përfshirjen e qytetarëve në jetën politike dhe politikbërjen.
Ata përshëndetën dhe vlerësuan Partinë Demokratike për përfshirjen e grave dhe të rinjve në politikë. Si dhe shprehën gatishmërinë për vazhdimin e mbështetjes së tyre në ndihmë të jetës parlamentare.
