Në një intervistë për mediat, ish-deputeti demokrat, Astrit Patozi, ka komentuar procesin e zgjedhjes së Presidentit. Patozi tha se pavarësisht se po trajtohet si një moment solemn, institucioni i presidentit është kthyer i parëndësishëm. Sipas tij, vetë mazhoranca e prishi kur zgjodhi Ilir Metën 5 vjet më parë, kur e futi në ‘burg’ politik.
“Presidenti është kthyer në një hallkë të parëndësishme, edhe kur sillesh si Ilir Meta. Dua të them se nuk ka ngelur ky shtet te presidenti. Edhe sikur ne të kemi presidentin më dinjitoz që mund të kishim, nuk do të ishte ndonjë krenari e madhe, nuk do kishim ndonjë çlirim të madh. Procesi që po ndiqet është aq qesharak aq dhe butaforik, se po sillen në një mënyrë shumë solemne, proces që vetë mazhoranca e prishi kur zgjodhi Ilir Metën 5 vjet më parë, kur e futi në ‘burg’ politik” – tha Patozi.
Ndërsa për zërat që kanë dalë ditët e fundit se kandidat për këtë post mund të jetë edhe Lulzim Basha, Patozi tha se ky është një diversion. Më tej ai tha se në përzgjedhjen e Presidentit, PS po të dojë të njohë edhe Komisionin e Rithemelimit dhe për këtë duhet të thërrasë Belind Këlliçin dhe jo Sali Berishën.
“Ai është një diversion që bëhet për të kompleksuar këta që po bëjnë rezistencë ndaj Sali Berishës. E fusin sikur Basha ka bërë ‘deall’, po ja u fut Basha i mori votat, do futet në zyrë të vrasë mizat. Por nuk besoj se do e bëjë këtë gjë, nuk do zgjidhet. PS po të dojë të njohë edhe Komisionin e Rithemelimit duhet të thërrasë Belind Këlliçin, jo Sali Berishën” – u shpreh Patozi.
Discussion about this post