Sot në orën 16:00 ishte afati i fundi për të dorëzuar propozimet zyrtare për kandidatët për president të republikës, teksa ende nuk ka asnjë emër për t’u hedhur në votim në raundin e parë që do të mbahet nesër në orën 17:00.Por, me sa duket qeveria dhe opozita ende nuk kanë gjetur konsensus sa i përket kandidaturave. Kujtojmë që brenda opozitës, ka grupime të ndryshme ku disa prej tyre mendojnë se e gjitha kjo “skemë negocimi” ishte një lojë e mazhorancës për të fituar pikë në sytë e publikut.
Nga opozita në negociata kanë qenë Fatmir mediu, Mesila Doda, Agron Duka, si dhe Enkelejd Alibeaj, por ky i fundit nuk gëzon mbështetjen e PD-së, e cila nën drejtimin e Komisionit të Rithemelimit ka mandatuar Luçiano Boçin dhe Oerd Bylykbashin. Gjithsesi zyrtarisht PD ka bindjen se Edi Rama e ka caktuar kandidatin për President, të cilin do e zgjedhë në raundin e 4 apo të 5-të, kur mjaftojnë 71 vota, ndërsa e ka cilësuar procesin e negociatave që drejtohet nga Damian Gjiknuri, Taulant Balla dhe Elisa Spiropali si një farsë.
Zyrtarisht përfaqësuesit e grupimeve opozitare nuk kanë shprehur emra konkretë si kandidatë, por janë ndalur në cilësitë që duhet të plotësoje kandidatura, duke kërkuar një figurë politike. Ndër emrat e lakuar për kreun e shtetit janë ato të Neritan Cekës apo Visar Zhitit, të cilat kryesisht janë artikuluar mediatikisht nga deputetë të opozitës, ndërsa socialistët nuk kanë hedhur poshtë mundësinë që Presidenca të drejtohet nga Fatos Nano, edhe pse kjo duket një zgjedhje e vështirë nga ana e Kryeministrit Edi Rama. Ky i fundit duket se mbvshtet idenë e një Presidenti larg politikës dhe përmes Erion veliajt ka sjellë në vëmendjen modelin e Presidencës gjatë kohës së Alfred Moisiut.
E duke qenë se raundi i parë i negociatave do të mbyllet pa një votim, pritet që të martën Konferenca e Kryetarëve të caktojë datën se kur do të mbahet raundi i 2-të, por Kushtetuta parashikon një afat 7 ditor, pra jo më larg se data 23 maj. Gjithsesi nuk përjashtohet mundësia që raundi i dytë të konsumohet të enjten ose të premten e javës që nis nesër duke shtuar kështu presionin ndaj grupimeve opozitare në negociatat me socialistët.
Discussion about this post