Presidenti i ri/ Zbulohet formula e socialistëve për zgjedhjen e kreut të shtetit

Është zbardhur formula me të cilën socialistët do të votojnë kreun e ri të shtetit që pritet të zëvendësojë presidentin Ilir Meta pas përfundimit të mandatit më 24 korrik të këtij viti.

Mësohet se, formula e propozuar nga Partia Socialiste për përzgjedhjen e kandidatëve do të kryhet përmes një zarfi anonim ku do të paraqiten 3 emra nga secili deputet socialist. Propozimet konkrete do të paraqiten në mbledhjen e grupit parlamentar të PS që pritet të zhvillohet ditën e martë.

Procedura përcakton qartë se një grup prej tre deputetësh, kreu i grupit parlamentar socialist, Taulant Balla, Sekretari i Përgjithshëm i PS, Damian Gjiknuri si dhe Ministrja e Shtetit për Marrëdhëniet me Parlamentin, Elisa Spiropali, do të jenë ata që do të bëjnë përzgjedhjen e këtyre kandidatëve të sjellë nga deputetët, ndërsa më herët kryebashkiaku Erion Veliaj ka thënë se i ka gati tre emrat.