Presidenti i Maqedonisë së Veriut, Stevo Pendarovski deklaron se prezenca e 5 mijë trupave të NATO-s në Kosovë është një garanci që kriza nuk do të përhapet në rajon, dhe është mirë që Maqedonia e Veriut, Mali i Zi dhe Shqipëria janë anëtare të NATO-s.
Në një intervistë për një radio vendase, ai tha se në këtë mënyrë mund të parandalohet një konfrontim i drejtpërdrejtë midis ushtrive të Kosovës dhe Serbisë.
“Ka pasur situata të ngjashme edhe më pare, pa trupat e NATO-s atje, konflikti do të ishte përhapur. Së pari, do të kishte ka qenë një konfrontim i drejtpërdrejtë ndërmjet ushtrive dhe policisë së Serbisë dhe Kosovës dhe më pas kjo do të ishte përhapur në rrethinë”, tha Pendarovski.
Një pjesëtar i Policisë së Kosovës u vra dhe 3 u plagosën në përleshjet me një grup të armatosur në veri të vendit. Rreshteri Bunjaku u vra në pritën që grupi i armatosur kishte zënë herët në mëngjes në hyrje të fshatit Banjskës në Zveçan.
Gjatë shkëmbimit të zjarrit u plagosën edhe 2 policë të tjerë. Më pas grupi i armatosur prej 30 anëtarësh u vendos në manastirin e Banjskës ku për orë të tëra, gjatë gjithë ditës së dielë u shkëmbyen të shtëna me policinë. Në mbrëmje ministri i Brendshëm i Kosovës deklaroi se 4 sulmues u vranë.
Tre trupat e serbëve u gjetën në të njëjtën ditë, ndërsa i katërti një ditë më vonë. Ndërkohë gjashtë persona të tjerë, që dyshohet se ishin të lidhur me ta, u arrestuan. Gjithashtu ishin sekuestruar sasi të madhe armatimi.
Discussion about this post