Presidenti rus Vladimir Putin tha se kundërofensiva e Ukrainës “ka dështuar” gjatë një takimi të dielën në Shën Peterburg me udhëheqësin bjellorus Alexander Lukashenko, aleatin e tij të ngushtë.
Sipas agjencive ruse të lajmeve në takim zoti Lukashenko kishte thënë se “nuk kishte kundërsulm”. Por Presidenti Putin i ishte përgjigjur duke shtuar: “ka, por ka dështuar”.
Ukraina e nisi kundërsulmin muajin e kaluar, por deri më tani ka shënuar përparime të vogla kundër forcave ruse, të cilat kontrollojnë më shumë se një të gjashtën e territorit të Ukrainës pas gati 17 muajsh lufte.
Gjenerali amerikan Mark Milley, komandanti i shtatmadhorisë amerikane, tha javën e kaluar se ofensiva ukrainase nuk ka dështuar, por ajo do të zgjasë shumë e do të jetë e vështirë dhe e përgjakshme.
Një kanal në aplikacionin Telegram, që mbështet presidentin Lukashenko, e citonte atë të thënë me shaka se luftëtarët e grupit mercenar rus Wagner, të cilët aktualisht po stërvitin ushtrinë e Bjellorusisë, dëshirojnë të futen në Poloni, një vend anëtar i NATO-s.
“Anëtarët e Wagner-it kanë filluar të na stresojnë, duan të shkojnë në perëndim. Ata thonë: ‘Hajde bëjmë një udhëtim për në Varshavë dhe Rzeszow”, citohet të ketë thënë ai.
Të enjten e kaluar, ministria bjelloruse e Mbrojtjes tha se luftëtarët e Wagner-it kishin filluar të stërvitnin forcat speciale bjelloruse në një poligon ushtarak vetëm disa kilometra larg kufirit polak.
Polonia ka shtuar trupat e saj afër kufirit me Bjellorusinë si përgjigje ndaj mbërritjes së forcave të grupit mercenar rus Wagner. Këto të fundit u zhvendosën në Bjellorusi pas një rebeli jetëshkurtër në Rusi muajin e kaluar.
Presidenti Putin paralajmëroi Poloninë të premten se çdo agresion kundër Bjellorusisë do të konsiderohej edhe si një sulm ndaj Rusisë. Ai tha se Moska do të përdorë të gjitha mjetet në dispozicion për t’iu përgjigjur çdo akti armiqësor ndaj Minskut.
Partner i dobishëm
Rusia dhe Bjellorusia janë vende partnere, me Moskën që ka një rol dominues. Por që nga nisja e agresionit në Ukrainë në shkurt të vitit 2022, presidenti Lukashenko është përpjekur t’i dëshmojë homologut rus se sa i dobishëm është vendi i tij. Në kuadër të kësaj ai lejoi Rusinë që të përdorë Bjellorusinë, si pikënisje të asaj që Moska e quan “operacion special ushtarak” në Ukrainë.
Po kështu zoti Lukashenko ka lejuar forcat ruse të stërviten në bazat ushtarake bjelloruse, përfshirë stërvitjet e shpeshta të përbashkëta si dhe ka marrë në dorëzim armët bërthamore taktike ruse, veprim që është dënuar nga Perëndimi.
Kremlini ka vlerësuar rolin prej ndërmjetësi të presidentit bjellorus për t’i dhënë fund rebelimit të muajit të kaluar nga ana e grupit Wagner, një ngjarje për të cilën zoti Putin ka thënë se rrezikoi për një kohë të shkurtër të fuste Rusinë me luftë civile.
Presidenti Lukashenko nuk e ka përfshirë drejtpërdrejtë ushtrinë e tij të vogël në luftën e Rusisë ndaj Ukrainës, por rreziku i një sulmi nga territori bjellorus, e ka detyruar Kievin të mbrojë kufirin e saj verior ndërsa përpiqet njëkohësisht të intensifikojë kundërsulmin, në lindje dhe jug të vendit./VOA
Discussion about this post