Kreu i grupit parlamentar të Partisë Socialiste, Taulant Balla ka bërë me dije se PS do t’i kërkojë kryetares së Kuvendit, Lindita Nikolla shtyrjen e konferencës së kryetarëve që do të diskutonte mbi agjendën parlamentare të zgjedhjes së presidentit.
Në një deklaratë për mediat, Balla tha se kjo shtyrje bëhet për t’i dhënë më shumë kohë opozitës të bëhet pjesë e procesit. Balla shtoi se raundi i parë i votimit për presidentin do të jetë në datë 10 Maj, ndërkohë që Konferenca e Kryetarëve është shtyrë më datën 4 Maj.
“Na kanë kërkuar që të kenë pak më shumë kohë në dispozicion, një spostim me disa ditë, të mbajtjes së konferencës së parë të kryetarëve, ideja është që konferenca e parë e kryetarëve të nisë në 4 Maj, dhe jo më vonë se data 10 Maj, të ishte mbajtja e raundit të parë të votimit të Presidentit të Republikës. Kjo shtyrje i shërben të gjitha grupeve parlamentare, për të qartësuar brenda vetes pozicionin, Kushtetuta e ka parashikuar qartë dialog në 3 raundet e para. Të gjitha grupet parlamentare të marrin kohën e nevojshme për të dialoguar, ne hyjmë në negociata me 3 grupet, me dëshirën për t’i dhënë vendit një President të të gjithë shqiptarëve”, tha Balla.
Discussion about this post