Kuvendi do të mblidhet ditën e sotme për të zhvilluar votimin e tretë për zgjedhjen e presidentit, ndërsa nuk ka asnjë kandidaturë të depozituar në Kuvend. Palët nuk kanë bërë asnjë hap para në negociata, duke bërë që të dështojë edhe raundi i tretë për zgjedhjen e presidentit të ri.
Kjo do t’i hapë rrugën mazhorancës që të zgjedhë vetë kreun e shtetit duke qenë se konsensusi me opozitën duket i vështirë. Ora 16:00 e të dielës së djeshme ishte mundësia e fundit e opozitës për të propozuar një emër për President dhe në Kryesinë e Kuvendit nuk mbërriti asnjë propozim.
Tashmë ‘barriera’ kushtetuese për 84 vota për zgjedhjen e kreut të ri të shtetit nuk ekziston më dhe në raundin e katërt, socialistët kanë paralajmëruar se do t’i japin shqiptarëve një president, pasi i kanë 71 votat që i duhen. Duke respektuar detyrimin kushtetues që raundet të mos bëhen më shumë se 7 ditë nga njëri-tjetri mund të themi se me shumë mundësi brenda një javë do të kemi një President të zgjedhur nga votat e socialistëve.
Kreu i Grupit të PD-së, Enkelejd Alibeaj akuzon mazhorancën se kanë prishur marrëveshjen, referuar këtu draftit të tij ku në një nga pikat parashikonte që emri i ri i presidentit të shkonte në Kuvend me firmat e përbashkët të demokratëve dhe socialistëve. Mirëpo, kreu i grupit socialist, Taulant Balla tha se nuk kanë pranuar një pikë të tillë dhe se një opozita nuk do i hiqte të drejtën mazhorancës që të propozonin një emër.
Sot Kuvendi do të zhvillojë 2 seanca radhazi, një për presidentin në orën 10:00 dhe një tjetër për rendin e ditës në 11:00 ku priten debate.
Discussion about this post