Simone Inzaghi është prezantuar sot si trajneri i ri i Interit. Tekniku italian zëvendëson Antonio Conten në stolin e kampionëve të Italisë. Gjatë konferencës për shtypin, 45-vjeçari preku disa tema, duke nisur nga objektivat, Romelu Lukaku, merkato dhe shitja e Achraf Hakimit.
“Entuziazmi është i madh dhe ndihem shumë i motivuar për këtë aventurë të re. Na pret një sfidë e madhe, duam të fitojmë sërish titullin dhe të paraqitemi sa më mirë në Champions League. Interi më bindi menjëherë me dëshirën e madhe për të më pasur mua trajner.
Unë dhe stafi im e dimë që kemi një skuadër të fortë, një klub të fortë dhe shumë tifozë që do na mbështesin. Dua të komplimentoj edhe Conten për fitimin e titullit kampion. Unë do të çoj përpara punën e nisur prej tij, me synimin për të realizuar objektivat e klubit“.
Më pas një koment për Romelu Lukakun dhe Christian Eriksen. “Kam biseduar disa herë me Romelun, është i trishtuar për eliminimin nga Euro 2020. Ai është një lojtar shumë i rëndësishëm për ne, një garanci. E ka treguar në fushë se çfarë është në gjendje të bëjë.
Por, edhe shokët e skuadrës janë një garanci për Lukakun, i cili në këto dy vite është mbështetur te puna e tyre e madhe. Eriksen?Kam folur me të përpara nisjes së Euro 2020, më pas nuk jemi dëgjuar. Më erdhi keq për atë që ndodhi, pasi besoja shumë tek ai.
Klubi i ka vendosur në dispozicion gjithçka që i nevojitet. Tani duhet të qëndrojë i qetë dhe të marrë veten me kalimin e kohës. Unë e pres me krahë hapur. Ndërkohë, drejtuesit u treguan të aftë dhe shfrytëzuan mundësinë për të siguruar shërbimet e Calhanoglu.
Çfarë kërkoj nga skuadra? Dua një skuadër që luan me intensitet të lartë, një skuadër që di të reagojë, qëndron gjithmonë në ndeshje dhe lufton deri në fund. Interi im nuk duhet të dekurajohet kurrë kur episodet nuk do të jenë në favorin tonë“.
Në fund një koment në lidhje me merkaton. “E dija që Hakimi do të largohej. Ishte planifikuar shitja e tij, por mund të them që ishte e dhimbshme. Ai kërkohej nga e gjithë Europa, ndërsa ne kishim nevojë për ta shitur për të rregulluar bilancet.
Por në të njëjtën kohë Interi do të mbetet kompetitiv dhe konkurrues. Kemi objektiv të kalojmë grupet e Champions, diçka që nuk ka ndodhur vitet e fundit, për shkak fati dhe dëmtimesh. Është një turne i vështirë dhe shumë fizik, por do jemi gati“, theksoi Simone Inzaghi.
