Në një fjalim të gjatë, kryetari i Partisë Demokratike, Sali Berisha, prezantoi këtë të hënë koalicionin “Aleanca për Shqipërinë Madhështore”, duke theksuar rëndësinë e këtij bashkimi për zgjedhjet parlamentare të ardhshme.
Berisha deklaroi se ky koalicion është “më i fuqishmi në 32 vite” dhe përfaqëson shumicën absolute të qytetarëve shqiptarë, duke përfshirë edhe elitën politike, ekspertët dhe profesionistët e shkolluar në vend dhe jashtë tij. Ai theksoi se koalicioni që përfshin PD me 25 aleatë, bashkon burra dhe gra, djem dhe vajza, si pjesë e një përpjekjeje për transformimin e Shqipërisë.
Berisha theksoi se momenti aktual është historik për shqiptarët, pasi vendi, sipas tij, po përpiqet të largohet nga periudha e diktaturës së dytë dhe të ndërtojë një Shqipëri të jetueshme dhe me dinjitet.
Një segment i veçantë i fjalimit u përqëndrua në diasporën shqiptare. Berisha deklaroi se viti 2025 do të jetë “viti i diasporës” dhe theksoi se shqiptarët jashtë vendit kanë bërë zgjedhjen e tyre për të “shpëtuar Shqipërinë”. Ai u premtoi se vota e diasporës do të jetë e sigurt dhe theksoi rëndësinë e përfshirjes së tyre në procesin zgjedhor.
Berisha lëshoi kritika ndaj qeverisë së drejtuar nga Edi Rama, duke e përshkruar atë si një figurë që nuk ka arritur të sjellë rezultate të prekshme gjatë 12 viteve të qeverisjes. Ai risolli akuzat për manipulime, “narkoshtet” dhe përçmimet që sipas tij, kanë sjellë ndarje mes të qytetarëve, duke u referuar në disa raste konkrete dhe termat e përdorur në debatet politike.
Në fjalim, Berisha prezantoi programin ekonomik dhe social të koalicionit të tij, duke premtuar masa konkrete për:
- Rritjen e pagave minimale dhe mesatare,
- Uljen e kostove të energjisë dhe ushqimeve,
- Investime në projekte të energjisë së rinovueshme dhe gazifikimin e vendit,
- Krijimin e një “karte konsumatori” për të ndihmuar familjet e prekur nga kostoja e lartë e jetesës,
- Përmirësimin e furnizimit me ujë dhe ilaçe, si dhe masa për rritjen e standardit të jetesës.
Berisha premtoi projekte për transformimin e Shqipërisë në një superfuqi energjetike rajonale. Ai theksoi potencialet natyrore të vendit për energji diellore dhe erë, si dhe rëndësinë e zhvillimit të infrastrukturës për të tërhequr investime dhe për të rritur prodhimin e energjisë së rinovueshme.
Në fund, Berisha theksoi se koalicioni ka potencialin për të realizuar projektin e “Shqipërisë Madhështore” brenda mandatit të parë dhe bëri thirrje për mbështetje të gjerë nga qytetarët në të gjitha rrethet, përfshirë edhe diasporën, në një përpjekje të përbashkët për transformimin e vendit.
Discussion about this post