Princ Leka denoncon ish-bashkëshorten dhe babanë e saj: Më dhunuan

Një konflikt është regjistruar pasditen e djeshme mes Princ Lekës dhe ish-bashkëshortes së tij Elia Zaharia.

Sipas burimeve, mësohet se Leka ka shkuar për të takuar vajzën e tij, por babai i Elia Zaharias, Gjergj Zaharia, e ka ofenduar dhe fillimisht kanë debatuar me tone të larta me njëri-tjetrin, ku më pas janë konfliktuar edhe fizikisht.

Sakaq, sipas dëshmisë së dhënë në polici për konfliktin, Princ Leka shprehet se është fyer nga ish-vjehrri dhe është goditur me një send të fortë para vajzës së tij.

“Ka qenë në ora 15:20 minuta në banesën time në rrugën “Murat Toptani” rezidenca familjes mbretërore Nr.6, Tirane për të takuar vajzën time të moshës 3-vjeçare, pasi me ish-bashkëshorten shtetasen Elia Zogu jemi në proces divorci. Unë fillimisht jam takuar me Shefin e administratës së Oborrit shtetasin Syl Mulosmanaj të cilin e kam pyetur në lidhje me një dollap që ishte boshatisur në kundërshtim me marrëveshjen.

Me pas unë i kam kërkuar Sylës që të më shoqëronte deri tek vajza ime për ta takuar, për të cilën me një marrëveshje për zgjidhje martese kemi rënë dakord me ish-bashkëshorten.

Unë jam ngjitur sipër së bashku me Sylën edhe kam gjetur vajzën time të vogël Geraldina Zogu e moshës 3-vjeç e cila ka qenë në shoqërinë e gjyshit të saj babit të ish-bashkëshortes shtetasit Gjergj Zaharia.

Në këtë momente unë kam përqafuar vajzën time edhe shtetasi Gjergj Zaharia ka filluar me fjalë fyese e kërcënuese në drejtimin tim duke më thënë t’i duhet të ndërrosh rrugën kur të më shikosh mua.

Reagimi im para kësaj situate ka qenë duke ju drejtuar Gjergjit që të mos më ofendoj e kërcënojë sidomos në prani të vajzës edhe i kam kërkuar që ai të largohet nga dhoma ku unë po qëndroja me vajzën.

Në këto momente situata ka agravuar shtetasi Gjergj Zaharia, më është afruar duke më shtyrë e goditur me shkelma tek këmbët e mia. Reagimi im ka qenë vetëm mbrojtës, por Gjergji ka vazhduar duke më goditur edhe më ka grisur xhupin si edhe ka marrë edhe një send të fortë (statujë druri) me të cilin më ka goditur”, thuhet në dëshminë e Princ Lekës.

Nga ana tjetër edhe Elia Zaharia së bashku me të atin kanë bërë një tjetër denoncim. Ngjarja është regjistruar në Oborrin Mbretëror, ku vajza e mitur jeton me mamanë e saj. Lidhur me ngjarjen bëhet me dije se Princ Leka ka kërkuar edhe urdhër mbrojtje.