Prindërit e Hashim Thaçit përfundojnë vizitën në Hagë, takim me djalin e tyre pas gati dy vitesh (Video)

Prindërit e ish-presidentit të Kosovës Hashim Thaçi kanë vizituar ditën e sotme djalin e tyre në qendrën e paraburgimit në Hagë, takim i ndodhur ky pas 2 vitesh.

Babai i ish-Presidentit, Haxhi Thaçi, dhe nëna Hyrë kishin udhëtuar drejt Hagës, aty ku po mbahen ish-krerët e UÇK prej gati dy vitesh.

Të dy prindërit janë parë të dalin nga dhomat e paraburgimit rreth orës 17:40.

Më 13 korrik do të mbahet konferenca e 13-të për ecurinë e çështjes në rastin e Hashim Thaçit, Kadri Veselit, Jakup Krasniqit dhe Rexhep Selimit.

Gjatë kësaj konference pritet që të diskutohet për zbulimin e provave, hetimet e mbrojtjes dhe hapat e tjerë të tyre, si dhe për propozimet për racionalizimin e çështjes.

Më 29 prill, Zyra e Prokurorit të Specializuar ka dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.

Prokuroria pretendon se katër të akuzuarit kanë kryer krime lufte edhe në Gjilan, Budakovë e Semetishtë.