Një aksident tragjik i mori jetën dy prindërve, teksa një vajzë 5-vjeçare i shpëtoi jetën vëllait të saj të vogël. Familja po udhëtonte me një mjet tip “Land Rover” në Kondinin, në Australinë Perëndimore.
Çifti Cindy Braddock, 25 vjeç dhe Jake Day, 28 vjeç, humbën jetën në vendngjarje në momentin që makina e tyre u përmbys, ndërsa tre fëmijët e tyre të mitur mbijetuan. Ata kishin mbetur të bllokuar në automjet me prindërit e tyre të vdekur me temperaturat e larta.
Familja prej pesë anëtarësh, përfshirë vajzën 5-vjeçe dhe dy vëllezërit e saj, të moshës 2 dhe 1 vjeç, ishin raportuar të zhdukur një ditë më parë.
E mitura mësohet se i shpëtoi jetën vëllait të saj më të vogël duke e çliruar atë nga sexholino, ku e kishin vendosur prindërit në makinë, shkruan CNN.
“Nëse nuk do të ishte 5-vjeçarja që i liroi rripat e sigurisë së sexholinos 1-vjeçarit, ai nuk do të ishte me ne sot”, tha një i afërm i tyre. “Ajo ndoshta nuk do ta kuptojë këtë për disa vjet. Ata qëndruan në makinë për 55 orë në temperaturën 30 gradë celcius. Askush nuk e di se çfarë kanë kaluar.”
Fëmijët u dërguan në spital të dehidratuar, tha policia, por ndodhen jashtë rrezikut për jetën.
Discussion about this post